Draugaskipið gæti komið að landinu um miðjan mars

Draugaskipið Lyubov Orlova, sem nú rekur um Atlantshafið, er væntanlegt að Íslandsströndum um miðjan mars. Framkvæmdastjóri aðgerðarsviðs Landhelgisgæslunnar segir ljóst að grípa verði til aðgerða ef skipið kemur inn fyrir lögsögu landsins.

Upphaflegar upplýsingar Landhelgisgæslunnar um staðsetningu skipsins gáfu til kynna að það væri á reki norðaustur af landinu og að það væri á eins til tveggja sjómílna hraða. „Samkvæmt okkar útreikningum gæti skipið orðið hér við Íslandsstrendur um miðjan mars," segir Ásgrímur K. Ásgrímsson, framkvæmdastjóri aðgerðarsviðs Landhelgisgæslunnar en hann var gestur í útvarpsþættinum Reykjavík síðdegis á Bylgjunni í dag.

Ekki er hægt að áætla nákvæmlegar hvar skipið mun koma að landi.

„Það hefur ekkert spurst til skipsins síðan 4. febrúar. Allt annað er byggt á gervihnattamyndum og þær gefa bæði til kynna að skipið sé staðsett um 700 sjómilur suðvestur af Reykjanesi og að það sé á svipuðum slóðum og síðast."

En mega menn stökkva um borð og eigna sér skipið?

„Okkar lög hérna á Íslandi gera ráð fyrir að ef skip rekur inn fyrir lögsöguna þá megum við grípa til ráðstafana til að koma í veg fyrir mengunarslys," segir Ásgrímur. „Eflaust vill enginn fá þetta skip inn í sína lögsögu, en einhver verður á endanum að grípa til aðgerða."

Hægt er að hlusta á viðtalið við Ásgrím í heild sinni hér fyrir ofan.