Karlmanni bannað að koma nálægt sextán ára stúlku

Hæstiréttur dæmdi í dag 32 ára gamlan karlmann í nálgunarbann. Hann má ekki koma að sextán ára gamalli unglingsstúlku í 50 metra radíus á meðan hún er á meðferðarheimilinu á Stuðlum né heldur þar sem hún er í langtímeðferð eða þar sem hún býr. Hann má heldur ekki hafa samband við telpuna í gegnum netið eða í gegnum sms. Það var barnavernd Reykjavíkur sem fór fram á nálgunarbannið.

Stúlkan hefur verið vistuð í langtímameðferð frá því í byrjun febrúar. Í kröfu barnaverndar kemur fram að stelpan hafi verið í harðri neyslu fíkniefna og í félagsskap sem talinn er hafa verið henni hættulegur. Telpan hafi litla innsýn í vanda sinn og þá hættulegu stöðu sem hún sé í. Hafi það verið mat barnaverndar að til þess að ná tökum á vanda hennar væri nauðsynlegt að vista hana á langtímameðferðarheimil fjarri þeim félagsskap sem hún sæki í og hafi það verið gert með hennar samþykki. Gerð sé krafa um að nálgunarbannið gildi á meðan vistun telpunnar á vegum barnaverndaryfirvalda vari eða til 4. febrúar 2014.

Í kröfu barnaverndar kemur fram að stúlkan hafi hitt manninn þann 10. febrúar síðastliðinn eftir að hún var vistuð á langtímameðferðarheimili. Með henni í för hafi tvær aðrar telpur sem einnig dvelji á meðferðarheimilinu og hafi þær allar þáð vímuefni sem maðurinn hafi boðið þeim. Þá hafi varnaraðili afhent telpunni 5 gr. af vímuefninu marijúana sem hún hafi tekið með sér til baka á meðferðarheimilið. Daginn eftir hafi varnaraðili sótt telpuna í skólann við upphaf skóladags. Þau hafi stundað kynlíf og maðurinn hafi keypt handa henni fatnað, snyrtivörur, skartgripi, látið hana hafa farsíma og 10 þúsund krónur í peningaseðlum.

Í gæsluvarðhaldskröfunni kemur jafnframt fram stúlkan hafi orðið vitni af grófum ofbeldisverkum s.s. barsmíðum mannsins og fylgt honum eftir þegar hann hafi ásamt vinum sínum innheimt vímuefnaskuldir.