Tölvuþrjótar reyna að blekkja viðskiptavini

Nokkrir viðskiptavinir Íslandsbanka hafa í morgun fengið póst þar sem þeir eru beðnir um að staðfesta notendaupplýsingar með því að tengjast netbankanum í gegnum vefslóð sem gefin er upp í póstinum.

Í tilkynningu frá bankanum segir að efni póstsins sé: Staðfesting reiknings Alerts.

„Pósturinn sem um ræðir er ekki frá Íslandsbanka heldur frá tölvuþrjótum sem vilja með þessu reyna að komast yfir notendanafn, lykilorð og aðrar upplýsingar um notendur Netbankans,“ segir í tilkynningunni.

Þeir sem hafa smellt á hlekkinn í tölvupóstinum eru hvattir til þess að skipta um lykilorð í netbankanum.