Netbankar í hættu

Margir fengu í dag póst í nafni Íslandsbanka þar sem þeir voru beðnir að staðfesta notendaupplýsingar með því að tengjast netbanka í gegnum vefslóð sem gefin var upp í póstinum. Pósturinn var ekki frá bankanum heldur frá tölvuþrjótum sem reyndu með þessum hætti að komast yfir notendanöfn og lykilorð notenda netbankans.

Már Másson, forstöðumaður samskiptamála hjá Íslandsbanka, segir póstinn hafa borist frá Bandaríkjunum en ekki er vitað hverjir stóðu á bak við hann. „Það sem vakir fyrir þeim er auðvitað að ná í upplýsingar sem þeir geta nýtt sér til að afla fjár með ólögmætum hætti.“

Óljóst er hversu margir fengu tölvupóstinn, en hann fór ekki eingöngu á viðskiptavini Íslandsbanka. Pósturinn bar þess merki að texti hans hefði verið þýddur með þýðingarvél og flestir gerðu sér því grein fyrir að um svik væri að ræða. „Það skiptir mjög miklu máli að viðskiptavinir notist ekki við tengla sem þeir fá í tölvupósti frá ókunnugum aðilum. Íslandsbanki sendir aldrei út tölvupósta þar sem óskað er eftir að viðskiptavinir uppfæri persónuupplýsingar á borð við notendanafn með tölvupósti,“ segir Már.

Viðskiptavinum er eftir sem áður óhætt að tengjast netbankanum í gegnum vefsíðu Íslandsbanka. Hafi einhverjir opnað linkinn í póstinum er ráðlegt að grípa til aðgerða. „Við mælum með því að viðkomandi skipti um lykilorð og það er reyndar mjög góð regla að skipta um lykilorð reglulega í netbankanum,“ segir Már.