Hjólamerki kostuðu rúmar sjö milljónir

Kostnaður vegna yfirborðsmerkingar hjólamerkja var 7.144.800 krónur í áætlun Reykjavíkurborgar vegna breytinga í Hofsvallagötu. 



Gróðurker, fuglahús og flögg á staurum kostuðu samtals 1.205.000 krónur en mestur kostnaður liggur í þeirri framkvæmd sem snýr að umferðaröryggismálum í götunni og hjólastígum eða nærri 17 milljónir. 



Í kjölfar umfjöllunar um kostnað Reykjavíkurborgar vegna skreytinga á hluta Hofsvallagötu undanfarna daga hefur fréttatilkynning frá Reykjavíkurborg verið send út með nánari útskýringum á kostnaði ásamt tilboðsskrá frá verktaka. 

Í tilkynningu segir að kostnaður vegna skreytinga á Hofsvallagötu sé aðeins lítill hluti af framkvæmdinni sem kostaði tæpar 18 milljónir króna. 

„Samkvæmt upplýsingum frá umhverfis- og skipulagssviði er framkvæmdin við götukaflann á Hofsvallagötu alls ekki dýr í samanburði við aðrar framkvæmdir á vegum borgarinnar. Þannig kosta ein gangbrautarljós að jafnaði 20 – 25 milljónir,“ segir í tilkynningu. 

Einnig kemur fram að framkvæmdin hafi verið hugsuð sem tímabundin lausn til að hægja á umferð og gera umferð gangandi og hjólandi vegfarenda öruggari. Til stendur að endurgera Hofsvallagötu alla með varanlegum lausnum í samráði við íbúa. Sú vinna er í fullum gangi.

Kostnaðaráætlun Reykjavíkurborgar vegna framkvæmdarinnar hljóðaði upp á 14.5 milljónir króna. Þrjú tilboð bárust en lægsta tilboðið átti Gleipnir verktakar ehf. 

Hér má sjá yfirflokka í kostnaðaráætlun vegna Hofsvallagötu ásamt stærstu kostnaðarliðum. 



Merkingar o.fl: 750.000 kr.

Aðstaða, öryggisráðstafanir, merkingar , upplýsingaskilti o.fl.



Yfirborðsfrágangur: 1.019.400 kr. 

Malbikvinna, hellulögn o.fl.



Lagnir: 197.000 kr.



Búnaður: 3.159.650 kr.

Gróðurkassar, járnrör og frágangur á þeim, flögg, fuglahús, bekkir o.fl. 



Gróður og gróðurvaxtarlag: 260.000 kr. 



Umferðarmerki: 86.000 kr.

Umferðarskilti og uppsetning



Yfirborðsmerkingar: 8.774.300 kr.

Akreinalínur, stöðvunarlínur, málun, strætómerki, hjólamerki (7.144.800 kr.) o.fl. 

Nánar um hjólamerki: 

Hjólamerki, h=1,0m 458 stk 2.519.000

Hjólamerki, h=0,7m 458 stk 2.381.600

Hjólamerki, h=0,4m 458 stk 2.244.200



Sérfræðivinna: 300.000 kr. 



Samtals: 14.546.350



Framkvæmdin kostaði tæpar 18 milljónir. Við bættist hönnunar- og eftirlitskostnaður.