Heimtar refsiaðgerðir gegn Íslendingum í kvöld

Sjávarútvegsráðherrar Evrópusambandsins fjalla nú um viðbrögð vegna veiða Íslendinga og Færeyinga á makríl. Írar og Bretar tilkynntu fyrir fundinn að tími væri kominn til að fara í hart vegna deilunnar. Forsætisráðherra Íslands fundar með forseta framkvæmdastjórnar Evrópusambandsins vegna málsins á morgun.

Í írskum fjölmiðlum kemur fram að Simon Coveney, sjávarútvegsráðherra þar í landi,  kallar eftir því að framkvæmdastjórn Evrópusambandsins beiti Íslendinga og Færeyinga hörku ef þeir undirgangist ekki kröfur sambandsins um veiðar á markíl.

Fullyrðir hann að Íslendingar og Færeyingar hafi veitt of mikið um langt skeið og skaðaða stofninn. Samningaviðræður hafi engu skilað.

Þetta er meðal þess sem nú er rætt að fundi sjávarútvegsráðherra sambandsins. Fundinn situr einnig Maria Damanaki, sjávarútvegsstjóri Evrópusambandsins, en búist er við því að hún gefi frá sér yfirlýsingu vegna málsins nú í kvöld.

„Það er gert ráð fyrir því að Damanaki gefi frá sér einhvers konar yfirlýsingu um fundinn og hvort hún ætli sér að hefja refsiaðgerðir gegn Íslendingum vegna makríldeilunnar. Það fer væntanlega eftir því hve mikill pólitískur þrýstingur er inn á fundinum hvað hún ákveður að gera," segir Jóhannes Þór Skúlason, aðstoðarmaður Sigmundar Davíðs Gunnlaugssonar forsætisráðherra, sem staddur er í Brussel.

Þeir Sigmundur og Jóhannes munu á morgun funda með José Manuel Barroso, forseta framkvæmdastjórnar Evrópusambandsins, og Herman Van Rompuy, forseta leiðtogaráðs Evrópusambandsins, og koma sjónarmiði Íslendinga í deilunni á framfæri.

Það er ljóst að mikil gremja er vegna þessa máls en Írar og Bretar eru sérstaklega háværir. Jóhannes segir Íslendinga þó eiga bandamenn innan fundarins.

„Það er ekkert ljóst um þetta enn þá, umboðið liggur hjá Mariu Damanaki og það fer eftir því hvernig stemmingin er inn á þessum fundi hve langt hún telur sig þurfa að ganga.

Blaðamannafundir verða eftir báða fundina en hægt verður að fylgjast með þeim í beinni útsendingu á vef Evrópusambandsins.