Útskrifumst úr grunnnámi á fertugsaldri

Íslenskir nemendur útskrifast elstir úr háskóla og næstelstir úr menntaskóla af nemendum OECD-ríkjanna. Þá er Ísland eina ríki OECD sem ver meiri fjármunum á hvern grunnskólanemanda en á hvern háskólanemanda.

Þetta er meðal þess sem kemur fram í nýrri skýrslu Efnahags- og framfarastofnunarinnar (OECD) þar sem fjallað er um menntamál. Skýrslan nefnist Education at a Glance og kom út í gær.

Fram kemur í skýrslunni að Ísland sker sig úr í samanburði við önnur ríki OECD á nokkra vegu.

Þannig útskrifast Íslendingar 30,7 ára að meðaltali úr grunnnámi á háskólastigi og 20,8 ára úr menntaskóla. Að meðaltali útskrifast nemendur í ríkjum OECD 26,6 ára og 18,7 ára á sömu mælikvarða. Þá hefur Ísland þá sérstöðu að íslenskir grunnskólar verja 8,6% meiri fjármunum á nemanda en íslenskir háskólar, á meðan háskólar í OECD verja umtalsvert meiri fjármunum á nemanda en grunnskólar í OECD.

Verkefnisstjórn Samráðsvettvangs um aukna hagsæld á Íslandi birti í maí tillögur sínar. Meðal aðgerða sem verkefnisstjórnin lagði til var að stytta grunn- og/eða framhaldsskólanám á Íslandi, auk þess sem hún taldi veruleg tækifæri til hagræðingar á grunnskólastigi.

Friðrik Már Baldursson, prófessor við viðskiptafræðideild Háskólans í Reykjavík, stýrði vinnu verkefnisstjórnarinnar. Segir hann að skýrslan sýni fram á að tækifæri séu til að gera betur í menntakerfinu.

„Auðvitað hafa þó margir mismunandi þættir áhrif á þetta. Grunnskólinn er dýr á Íslandi en það hefur aldrei verið fyllilega skýrt. Sú skýring sem oftast er nefnd er sú að Ísland er dreifbýlt og með marga litla skóla en mig grunar að fleira komi til,“ segir Friðrik og bætir við að hægt sé að ná hagræðingu í grunnskólakerfinu án þess að fórna aðgangi allra að staðbundinni menntun.

„Stygging grunn- og framhaldsskóla gæti skilað talsverðum ávinningi fyrir samfélagið; komið nemendum fyrr út á vinnumarkaðinn og minnkað brottfall,“ segir Friðrik.