Ógnandi og óviðráðanlegur flugfarþegi settur af í Kanada

Fljótlega eftir flugtak vélar Icelandair í gærkvöldi frá New York, á leið til Keflavíkur, fór farþegi að sýna af sér ógnandi framkomu, við aðra farþega og áhöfn. Var manninum vísað frá borði í Kanada.

Þegar engu tauti var við manninn komið ákvað flugstjóri að lenda í Goose Bay í Kanada áður en flogið var yfir Atlantshafið. Vísir heyrði í Guðjóni Arngrímssyni eftir að hann hafði fengið útskýringar á atburðum frá þeim sem í vélinni voru.

"Maðurinn var í raun alveg óviðráðanlegur. Þá var ákveðið að lenda þarna í Goose Bay og setja hann af. Það gekk bara vel fyrir sig. En, það kannski skýrir hegðunina að ekki fór milli mála að viðkomandi einstaklingur átti við einhvers konar andleg veikindi að stríða."

Um þriggja tíma seinkun varð á áætluninni en jafnframt þurfti að finna farangur mannsins í farangursrými og setja hann af borði. Lenti vélin í Keflavík skömmu fyrir klukkan tíu í morgun. Samkvæmt heimildum Vísis er ekki um íslenskan ríkisborgara að ræða.