Erlendir ferðamenn 673 þúsund í fyrra

Erlendir ferðamenn voru um 673 þúsund árið 2012. Þetta kemur fram í nýútkominni ársskýrslu Ferðamálastofu fyrir árið 2012.

Um er að ræða 18,9 prósenta fjölgun frá 2011 en þá voru erlendir ferðamenn um 565 þúsund talsins. Langflestir komu með flugi um Keflavíkurflugvöll eða 96,2 prósent; 1,9 prósent komu með Norrænu um Seyðisfjörð og 1,9 prósent með flugi um Reykjavíkur-, Akureyrar- eða Egilsstaðaflugvöll.

Þar fyrir utan eru farþegar með skemmtiferðaskipum en frá árinu 2000 hefur farþegum til landsins með skemmtiferðaskipum fjölgað verulega eða úr 26 þúsund árið 2000 í um 95 þúsundun farþegar árið 2012. Fjölgunin þar hefur verið að jafnaði 12,4 prósent milli ára.