Meðganga áhættuþáttur fyrir heimilisofbeldi

„Þessar tölur koma okkur ekki á óvart“, segir Sigþrúður Guðmundsdóttir forstöðukona Kvennaathvarfsins, en Fréttablaðið greindi frá því í dag að fimmta hver kona verður fyrir heimilisofbeldi á lífsleiðinni. Þrjátíu prósent þeirra verði fyrir ofbeldinu á meðan meðgöngu stendur.

Sigþrúður segir barnshafandi konur leita í skjól til Kvennaathvarfsins á öllum tímum meðgöngunnar. Hlutfallið sé engu að síður óhugnalega hátt, sérstaklega á tímum þar sem sambandið ætti að vera að blómstra. Það séu jafnvel dæmi um að ofbeldið verði enn grófara á meðan konan er ófrísk.

Ekki vitað hvort konurnar séu ófrískarAðspurð segir Sigþrúður úrræði fyrir konurnar vera í höndum félagsþjónustu og ljósmæðra. Þá sé mörgum vísað til Kvennaathvarfsins þar sem þær eru hýstar og þeim veitt ráðgjöf. ,,Þetta er hið versta mál. Það má ekki gleymast að heilsufar þungaðra kvenna er mjög mikilvægt þar sem það eru tvö líf í húfi. Aftur á móti spyrjum við konurnar ekki hvort þær séu ófrískar þegar þær koma til okkar og því vitum við ekki alltaf stöðuna á konum sem eru skemur komnar og sést ekki á.“

Ofbeldið kemur í ljós í mæðraskoðunumÁstþóra Kristinsdóttir, ljósmóðir, segir í viðtali við Fréttablaðið í dag að þrjátíu prósent kvenna, sem verði fyrir heimilisofbeldi, upplifi ofbeldið í fyrsta skipti á meðgöngunni. Nýjar verklagsreglur gera ráð fyrir að ljósmæður skimi fyrir ofbeldi í mæðraskoðunum. Þetta hefur leitt í ljós að ein af hverjum fimm barnshafandi konum hefur orðið fyrir ofbeldi. „Hrikalegar tölur“ segir Ástþóra.

Gott að gengið sé beint til verksSigþrúður fagnar umræðunni og segir þróun verklagsreglanna vera ofboðslega mikilvæga. Það sé mjög ánægjulegt hversu hratt ljósmæður hafi brugðist við og gengið beint til verks. „Almennt tekur lengri tíma að slíta ofbeldissambandi heldur en fólki sem stendur utan við það finnst eðlilegt. Að viðurkenna ofbeldið er oft fyrsta skrefið.“