Þrotabú Jafets fær tvo bíla til baka

Jafet Ólafssyni hefur verið gert að skila þrotabúi Jafets Ólafssonar tveimur bílum, annars vegar 2007 árgerð af Mercedes Benz C og hins vegar 2008 árgerð af Toyota LandCruiser.

Jafet Ólafsson var tekinn til gjaldþrotaskipta í júlí 2011. Hann var skráður eigandi beggja bílanna. Skráningu í ökutækjaskrá Umferðarstofu var breytt 14. nóvember 2008 og eignarhaldsfélagið Veigur skráð eigandi beggja bifreiðanna, en félagið var á þeim tíma í eigu Jafets. Báðar bifreiðarnar voru síðan skráðar 30. nóvember 2009 á nafn Hildar Hermóðsdóttur, sem er eiginkona Jafets.

Þrotabú Jafets Ólafssonar krafði Veig einnig um fimmtán milljónir króna, sem var söluandvirði bílanna árið 2008. Héraðsdómur Reykjavíkur taldi, með dómi sem var kveðinn upp fyrir helgi, að ekki væri komin fram nægjanlega sterk rök fyrir þeirri fjárkröfu eða sönnun á því hvert verðmæti bílanna væri í dag. Fjárkröfu var því hafnað.