Nam sjö ára telpur á brott og braut á þeim

Maður situr í gæsluvarðhaldi grunaður um kynferðisbrot gegn tveimur sjö ára stúlkum. Hann sagðist hafa séð þær stela nammi, skipaði þeim að koma með sér og ók með þær á afvikinn stað. Grafalvarlegt mál að stela börnum, segir lögregla.

Karlmaður á fertugsaldri situr nú í gæsluvarðhaldi eftir að hafa gabbað tvær sjö ára telpur upp í bíl sinn í Árbæ á þriðjudag brotið á þeim kynferðislega.

Björgvin Björgvinsson, yfirmaður kynferðisbrotadeildar lögreglunnar á höfuðborgarsvæðinu, staðfestir að maðurinn sé í haldi, grunaður um að hafa brotið á stúlkunum. Hann segir málið litið alvarlegum augum.

„Það er auðvitað grafalvarlegt mál að nema börn svona á brott – að stela börnum í rauninni," segir hann. Hann segir að brotið geti varðað við 193. ákvæði hegningarlaga sem kveður á um barnsrán. Við því liggur að hámarki sextán ára fangelsi. Gæsluvarðhaldsúrskurðurinn yfir manninum, sem kveðinn var upp á þriðjudag, er meðal annars grundvallaður á því. Björgvin varðist frekari fregna af málinu.

Samkvæmt heimildum Fréttablaðsins höfðu stúlkurnar stolist til að taka sælgæti ófrjálsri hendi úr nammibarnum í verslun Krónunnar í Árbæ. Þær stóðu síðan fyrir utan búðina og gæddu sér á fengnum þegar maðurinn gaf sig á tal við þær, sagðist hafa séð til þeirra og að þær þyrftu að koma með honum. Hann mun þó ekki hafa villt á sér heimildir sem lögreglumaður.

Telpurnar settust upp í bíl til mannsins, sem ók með þær á afvikinn stað, þar sem hann er talinn hafa brotið gegn þeim kynferðislega. Hann skilaði þeim síðan aftur í nágrenni búðarinnar. Brotin munu þó ekki hafa verið af allra grófasta tagi.

Lögregla lýsti eftir manninum á þriðjudag eftir að hafa fengið tilkynningu um málið. Maðurinn gaf sig sjálfur fram í kjölfarið að myndir birtust af honum í fjölmiðlum. Hann var úrskurðaður í gæsluvarðhald til mánudags vegna rannsóknarhagsmuna.