Sendur út í opinn dauðann verði hann framseldur

Yfirvöld í Bandaríkjunum hafa ákært uppljóstrarann Edward Snowden fyrir njósnir og hafa farið þess á leit við yfirvöld í Hong Kong að hann verði handtekinn. Birgitta Jónsdóttir, þingmaður Pírata, segir að verði hann framseldur til Bandaríkjanna sé verið að senda hann út í opinn dauðann.

Stjórnvöld í Bandaríkjunum lögðu fram ákæruna á hendur Snowden í gær og í kjölfarið var gefin út handtökuskipun á hendur honum. Snowden sem átti þrítugsafmæli í gær er staddur í Hong Kong, en ekki er vitað hvar hann er niðurkominn í borginni. Bandarísk stjórnvöld hafa farið þess á leit við stjórnvöld í Hong Kong að hann verði handtekinn og framseldur til Bandaríkjanna, en framsalssamningur er í gangi á milli landanna.

Það var dómstóll í Virginíu sem gaf út handtökuskipunina á hendur Snowden, en hann er ákærður fyrir að hafa upplýst um stórfellt eftirlit Þjóðaröryggisstofnunnar Bandaríkjanna með síma- og netnotkun fjölda Bandaríkjamanna. Snowden hefur óskað eftir pólitísku hæli á Íslandi og vonast Birgitta Jónsdóttir, þingmaður Pírata, til þess að íslensk stjórnvöld geri sitt til þess að sú ósk verði uppfyllt, meðal annars vegna þess að dauðadómar eru enn við lýði í Virginíufylki.