Ljúf jólastemning á Ingólfstorgi

Árlegi Jólamarkaðurinn á Ingólfstorgi í Reykjavík verður með töluvert öðru sniði en áður. Markaðurinn stendur yfir fram á Þorláksmessu og munu fleiri söluaðilar kynna og selja vörur sínar en áður að sögn Hlédísar Sveinsdóttur, sem sér um skipulag hans, en á Ingólfstorgi eru þrettán jólabjálkahús, tvö topptjöld og síðasta fimmtudag bættist 180 fermetra markaðstjald í hópinn.

„Það er því óhætt að segja að hér sé um stærsta jólamarkað landsins að ræða. Hér geta gestir kynnt sér og keypt mjög fjölbreytt úrval enda lögðum við mikið upp úr fjölbreytileikanum. Hér blöndum við saman handverki, hönnun, gjafavörum, ljúffengum matvælum, tónlist, listum og öllu því sem fellur undir að gleðja landann í einni eða annarri mynd yfir jólin.“

Jólamarkaðurinn stóð yfir fyrstu tvær helgarnar í desember og um helgina og á mánudag, Þorláksmessu, verður mikið annríki á Ingólfstorgi en um 45 söluaðilar verða þar síðustu dagana fyrir jólin. „Við bjóðum upp á mikla fjölbreytni eins og fyrr segir en einnig má benda á að seljendur eru hér ekki allir á sama tíma þannig að hafi einhver heimsótt markaðinn fyrr í mánuðinum getur hann átt von á nýjum hópi seljenda um helgina. Sjón er því sögu ríkari og ég hvet alla til að mæta á síðustu daga markaðarins.“

Jólamarkaðurinn hefur fest sig í sessi sem áfangastaður í jólaundirbúningi borgarbúa og skapast gott andrúmsloft innan um ilmandi matvæli og fallegar vörur. „Auk þeirra vara sem seldar eru hér verður boðið upp á lifandi tónlist og dávaldur mun bjóða upp á ókeypis ördáleiðslu. Svo má nefna að kaffihúsið GÆS mun setja upp kaffihús í markaðstjaldinu og mig grunar sterklega að jólasveinninn líti við.“

Jólamarkaðurinn verður opinn í dag og á morgun, sunnudag, frá kl. 12-22 en á Þorláksmessu verður opið til kl. 23. Nánari upplýsingar má finna á Facebook undir Jólamarkaðurinn Ingólfstorgi.