Íslenskt barnaefni slær í gegn

„Við erum rosalega ánægð með viðtökurnar og stolt af þessu þriggja sería safni,“ segir Þorleifur Einarsson, leikstjóri, brúðugerðarmaður og einn handritshöfunda barnaefnisins Daginn í dag. Þriðja serían af barnaefninu var frumsýnd við góðar undirtektir í Sambíóunum í Egilshöll fyrir skömmu fyrir fullum bíósal.

Um er að ræða alíslenskt barnaefni sem skrifað er af Þorleifi, Guðna Má Harðarsyni og Guðmundi Karli Brynjarssyni en báðir þeir síðarnefndu eru prestar í Lindakirkju. Fyrsta serían var ódýrt tilraunaverkefni sem þó stendur enn fyrir sínu en þættirnir hafa þróast heilmikið síðan árið 2010.

„Ég sagði strax já við Guðna, þegar hann bað mig að vera með. Það er svo gefandi að að vinna með þessar erkisögur vestrænnar menningar, sem miðla góðum gildum og siðferði, og færa þær í nútímalegt samhengi íslenskra barna í dag “ segir Þorleifur. En það var ekki dans á rósum að koma efninu út.

„Þetta er 95 prósent fjármagnað styrkjalaust og það leggjast allir á eitt við að framleiða efnið. Það vinna allir verkefnið af ástríðu, hugsjón og eldmóði,“ bætir Guðni Már við. Þorleifur bjó til allar brúðurnar sem fram komu í þáttunum en þær eru alls um fimmtán. „Þar sem fjármagnið var nú ekki mikið til að moða úr, þá, eins og máltakið segir, kennir neyðin naktri konu að spinna. Ég kunni ekkert í brúðugerð en náði þó að nýta myndlistarbakgrunn minn, YouTube-myndbönd og aðstoð móður minnar til að búa brúðurnar til,“ útskýrir Þorleifur, sem notaði meðal annars borðtenniskúlur, plastskeiðar og ýmislegt annað forvitnilegt við gerð brúðanna.

Salan á fyrsta disknum, Daginn í dag eitt, gekk mjög vel, sem varð til þess að Skálholtsútgáfan gat spennt bogann aðeins. „Við renndum blint í sjóinn með fyrsta diskinn en hann seldist mjög vel og gátum við því lagt aðeins meira í diska tvö og þrjú sem teknir voru upp á sama tíma sumarið 2012. Einnig vorum við líka að svara mikilli eftirspurn,“ bætir Guðni Már við.

Efni þáttanna er fjölbreytt en þeir fjalla um krakkana Hafdísi og Klemma sem leikin eru af Hafdísi Mariu Matsdóttur og Jóel Inga Sæmundssyni, sem rata í skrautleg ævintýri sem kallast á við þema hvers þáttar. Atburðarásin er síðan brotin upp með vinsælum sunnudagaskólalögum.

„Það kom okkur mikið á óvart hversu breitt aldursbil þessir þættir spanna en við vitum til þess að krakkar á aldrinum tveggja til þrettán ára hafi gaman af þáttunum,“ bætir Þorleifur við.

Ásamt leikatriðum, brúðum og söng, sér Gunnar Júlíusson um að teikna myndir sem eru svo hreyfðar af Atla Þór Einarssyni svo úr verða alíslenskar teiknimyndir, þema hvers þáttar, byggðar á dæmisögum Jesú.

Innlegg by Daginn í dag.