Skyggnst bak við tjöldin hjá UN Women: Saga Sig og Katrín María Káradóttir

„Mér finnst UN Women vinna þarft starf í þágu málefna sem snerta okkur öll – ég elska að vinna með snillingum og allir sem komu að átakinu eru það,“ segir Saga Sig ljósmyndari um UN Women-bolinn sem hún ásamt Katrínu Maríu Káradóttur, yfirhönnuði ELLU, hannaði fyrir landsnefnd UN Women á Íslandi.

Það er ósk þeirra að með hverjum bol sem selst aukist meðvitund landsmanna um stöðu kvenna og stúlkna í fátækustu löndum heims og um leið samtökin.

Allur ágóði af bolunum rennur í Styrktarsjóð Sameinuðu þjóðanna til afnáms ofbeldis gegn konum. Sjóðurinn styrkir verkefni sem miða að því að uppræta ofbeldi gegn konum og stúlkum og stuðla að auknu jafnrétti þeirra. 

„Í tilefni af útkomu bolanna fengu samtökin konur og stúlkur úr öllum áttum og á öllum aldri til liðs við sig fyrir sérstaka auglýsingaherferð sem Saga tók. Myndatakan fór fram í Ljósmyndaskóla Sissu og er óhætt að segja að dagurinn hafi verið stórskemmtilegur,“ segir Hanna Eiríksdóttir hjá UN Women.

Bolurinn verður seldur í takmörkuðu upplagi og kemur í verslanir um miðjan mánuðinn. Efnt verður til veislu þegar bolirnir koma í sölu í húsakynnum ELLU.

Katrín María Káradóttir hefur komið víða við, meðal annars verið við starfsnám hjá BBC í London og hjá John Galliano/Dior, þar sem hún tók svo síðar við starfi aðstoðarhönnuðar; hún hefur unnið í skyrtuverksmiðju og hjá Þjóðleikhúsinu. 

Katrín María Káradóttir er um þessar mundir yfirhönnuður ELLU og fagstjóri hönnunar- og arkítektúrdeildar Listaháskóla Íslands, ásamt því að starfa við leiðsögn og hefur eytt töluverðum tíma á Austur-Grænlandi við þá iðju.

Saga Sig var ljósmyndastjóri Verzlunarskólablaðsins á menntaskólaárunum. Það var þá sem hún áttaði sig á því að hún vildi vinna við ljósmyndun sem listform. Saga fór í eitt ár í listfræði í Háskóla Íslands en flutti svo til London þar sem hún lærði tískuljósmyndun í London College of Fashion. Hún útskrifaðist þaðan árið 2011 og hefur síðan verið iðin við kolann, og meðal annars myndað fyrir NIKE Women, KALDA, KronKron, Topshop, Burberry og Harpers Bazaar Arabia svo eitthvað sé nefnt.