Kristján neitar að hætta

Kristján Finnbogason er genginn til liðs við FH og mun spila með liðinu næsta sumar.

Daði Lárusson lagði hanskana á hilluna eftir tímabilið og því vantaði FH-inga nýjan varamarkvörð.

Kristján er gríðarlega reyndur og var á mála hjá Fylki síðastliðin tvö tímabil en leikmaðurinn er 42 ára og var stóran hluta af ferli sínum í KR.

Róbert Örn Óskarsson verður áfram aðalmarkvörður liðsins.

„Þá vantaði varamarkvörð eftir að Daði [Lárusson] lagði hanskana á hilluna og ég var til í þetta verkefni,“ segir Kristján.

„Mig langaði bara að koma inn í þetta og aðstoða eins og ég get. Skrokkurinn hefur vissulega verið betri og maður er farinn að eldast en það er bara gaman að vera partur af hóp og æfa reglulega".

„Vonandi þarf maður ekki að leysa Robba [Róbert Örn Óskarsson] mikið af, hann er frábær markvörður og ég er flottur varamarkvörður,“ sagði Kristján léttur.