Norðurland á topp tíu lista Lonely Planet

Lonely Planet er einn fremsti ferðavísir heims og er listinn settur saman af ritstjórnarliði fyrirtækisins, álitsgjöfum og hinum ýmsu rithöfundum frá Bandaríkjunum og Bretlandi.

Í tilkynningu frá Lonely Planet segir að norðurhluti Íslands sé einn af þeim stöðum sem ferðalangar ættu að bæta á óskalistann sinn í ár, en svæðið er í þriðja sæti af tíu. Fólk er hvatt til að hverfa burt úr Reykjavík og hinum vinsæla Gullna hring til að upplifa aðdráttarafl norðursins, meðal annars höfuðstaðinn Akureyri, sem og Jarðböðin við Mývatn, Námaskarð, Dettifoss og Ásbyrgi, svo dæmi séu tekin.

Haft er eftir Andy Murdock, stafrænum ritstjóra Lonely Planet í Bandaríkjunum, að fáir staðir á jörðinni séu jafn umtalaðir í dag og Ísland. Landið sé tiltölulega ódýrt, listir og menning blómstri og svo virðist sem almenn þörf ríki meðal fólks að baða sig í heitum náttúrulaugum, sem skili sér í því að Ísland sé efst í huga allra ferðalanga þetta árið. 

Meðal annarra staða á lista Lonely Planet eru Porto í Portúgal, Kaupmannahöfn í Danmörku og Norður-Írland.