Blendin viðbrögð við tilfærslu frídaga

„Öll trúfélög gera ráð fyrir að fólk eigi frídaga, ekki einungis til að lofa guð heldur til hvíldar. Þess vegna tel ég að það væri nær að fjölga frídögum frekar en færa þá til,“ segir Þorvaldur Víðisson biskupsritari um frídagafrumvarp Bjartrar framtíðar sem nú liggur fyrir Alþingi.

Samkvæmt því verður gefið frí á föstudegi eftir uppstigningardag og sumardaginn fyrsta. Beri jóladag, annan í jólum, nýársdag og 17. júní upp á frídag á að gefa aukafrídag næsta virka dag á eftir. Loks er kveðið á um það í frumvarpinu að 1. maí verði haldinn hátíðlegur fyrsta mánudag í maí.

Þjóðkirkjan leggst alfarið gegn því að afnema uppstigningardag sem almennan frídag. Kirkjan segir að hann sé messudagur í flestum kirkjum landsins. Þjóðkirkjan vilji stuðla að því að þeir sem kjósi eigi þess kost að sækja kirkju á helgum og hátíðum og rækta trú sína og samfélag.

Þær eru fleiri efasemdaraddirnar. Halldór Grönvold, vinnumarkaðssérfræðingur hjá ASÍ, segir að tilfærsla á frídögum hafi ekki verið til umfjöllunar innan ASÍ nokkuð lengi.

„Við vitum þó að það eru ólík sjónarmið meðal aðildarfélaga okkar og félagsmanna varðandi tilflutning á frídögum,“ segir Halldór. Hann bendir á að margir hafi þann sið að vinna af sér föstudaginn eða taka hann sem orlofsdag og fá þannig langa og góða helgi. Hann segir það þó jákvætt ef fólk fengi frí þegar rauðir dagar falla á helgar. Halldór segir að það sé ekki Alþingis að taka ákvörðun um breytingar á frídögum án samráðs við launþegahreyfingarnar í landinu. Hann segir að samninganefnd Alþýðusambandsins komi saman á næstunni og þar verði mótuð samræmd stefna varðandi þetta mál.

Þorsteinn Víglundsson, formaður Samtaka atvinnulífsins, sagði í samtali við Vísi að engin forsenda væri fyrir því að fjölga frídögum á Íslandi. Hann segir SA hlynnt því að færa frídaga í miðri viku upp að helgum, slíkt auki framleiðni í þjóðfélaginu. Framleiðslustopp í miðri viku hafi gríðarlegt óhagræði í för með sér fyrir framleiðslufyrirtækin.