Goðsögn í Bíó Paradís

Mikið verður um að vera dagana 19. til 29. september þegar Evrópska kvikmyndahátíðin, EFFI, verður haldin í Bíói Paradís. Þar verður sýndur þverskurður af því besta sem álfan hefur upp á að bjóða innan kvikmyndagerðar.



Hátíðin hefst með ókeypis kvikmyndasýningu, þegar hin margverðlaunaða Broken Circle Breakdown verður sýnd. Stærsti viðburður hátíðarinnar er þó sýning á myndinni Í myrkrinu, eða In Darkness, eftir Agniezsku Holland, með sérstakri sjónlýsingu fyrir blinda. Þessi dagskrárliður er hluti af samvinnuverkefni Bíós Paradísar og Wroclaw-West-menningarmiðstöðvarinnar í Póllandi um bætt aðgengi fatlaðra að menningu.



Pólski kvikmynda- og sjónvarpsleikstjórinn Agniezska Holland er heiðursgestur hátíðarinnar að þessu sinni. Miðasala fer fram á Midi.is og í miðasölu Bíós Paradísar.