Yfir 500 kynferðisbrot kærð frá áramótum

Alls voru 517 kynferðisbrot kærð til lögreglunnar á fyrstu átta mánuðum ársins samkvæmt upplýsingum frá Ríkislögreglustjóra og er það metfjöldi. Til samanburðar þá bárust rúmlega 140 kærur til lögreglu vegna kynferðisofbeldis á öllu síðasta ári.

Þá hafa alls 178 kærur borist til embættis ríkissaksóknara frá janúar, en það eru nokkuð fleiri mál en hafa borist embættinu síðustu tvö ár.

Óhætt er að segja að holskefla kynferðisbrota hafi verið kærð til kynferðisafbrotadeildar lögreglunnar, eftir umfjöllun fréttaskýringarþáttarins Kastljóss um barnaníðinginn Karl Vigni Þorsteinsson í kringum síðustu áramót.

Þetta sést glögglega í bráðabirgðartölum ríkislögreglustjóra sem Fréttablaðið hefur undir höndum, en 92 kynferðisbrot voru kærð í janúar einum, þegar umfjöllun miðilsins fór sem hæst.

Nokkuð ber á milli í kærum til lögreglu og málum sem enda svo að lokum hjá ríkissaksóknara. Þannig er búið að ákæra í 29 málum frá janúar og fella niður þrjú af þeim 124 málum sem bárust embættinu frá áramótum. Það er því búið að ákæra í um sex prósent mála sem hafa verið kærð til lögreglu frá áramótum.

Staðan þótti svo alvarleg á fyrri hluta þessa árs að Jóhanna Sigurðardóttir, fyrrverandi forsætisráðherra, setti á fót sérstakan starfshóp fjögurra ráðuneyta undir formennsku Ágústs Ólafs Ágústssonar til að bregðast við vandanum.

Starfshópurinn skilaði af sér viðamikilli skýrslu með 27 tillögum til úrbóta en af þeim voru fimmtán tillögur settar í forgang. Þar var meðal annars gert ráð fyrir ellefu nýjum stöðugildum til að mæta brýnni þörf.

Ríkisstjórnin ákvað að verja 79 milljónum króna til að fjármagna forgangsaðgerðir til að bregðast við neyðarástandi í kynferðisbrotum gegn börnum eins og það var orðað í apríl síðastliðnum.

Þrátt fyrir mikinn fjölda kæra sem hafa borist embætti ríkissaksóknara á árinu þá er þetta langt því frá að vera mesti fjöldinn sem hefur borist embættinu.

Árið 2008 bárust 258 kynferðisbrot til embættisins. Þá var ákærutíðni með svipuðu móti og síðustu ár, eða um helmingur mála. Þá má búast við því að stór hluti kæra sem bárust lögreglu vegna kynferðisafbrota berist ríkissaksóknara á næsta ári.