Vongóð um að ljúka málinu

Önnur umræða um umdeilt frumvarp um Hagstofuna fór fram á Alþingi í gær. Þar lagði meirihluti allsherjar- og menntamálanefndar fram breytingatillögur til þess að koma til móts við minnihlutann, sem hefur gagnrýnt frumvarpið harðlega, meðal annars fyrir að brjóta á friðhelgi einkalífsins.

Líneik Anna Sævarsdóttir, þingmaður Framsóknarflokksins og fulltrúi í allsherjar- og menntamálanefnd, útilokar ekki að frumvarpið breytist frekar. „Maður útilokar það ekki en eins og ég sé málið verður ekki gengið mikið lengra í þeim efnum ef það á að ná markmiðum frumvarpsins.“

Líneik sagði í viðtali við Fréttablaðið í byrjun september að markmið frumvarpsins væri fyrst og fremst að stjórnvöld fengju traustar upplýsingar um skuldagreiðslur og eiginfjárstöðu heimilanna í landinu til að geta metið áhrif af aðgerðum stjórnvalda varðandi skuldavanda heimilanna.

Önnur umræða heldur áfram á morgun og er Líneik vongóð um að það náist að samþykkja frumvarpið áður en þingi lýkur í næstu viku.