Fagna nýju mati í Bjarnarflagi

„Við fögnum því að það er verið að opna á þann möguleika að þetta verði skoðað betur,“ segir Guðmundur Hörður Guðmundsson, formaður Landverndar. Landsvirkjun kynnti í gær úttekt verkfræðistofunnar Eflu á núgildandi mati á umhverfisáhrifum fyrir Bjarnarflagsvirkjun.

Helstu niðurstöður verkfræðistofunnar voru að áhrif lítilla jarðskjálfta vegna djúplosunar affallsvatns í Bjarnarflagi væru vanreifuð í gildandi umhverfismati virkjunarinnar frá 2003.

Hörður Arnarson, forstjóri Landsvirkjunar, vill því að sá þáttur verði metinn á ný. Hörður segir að 15 mánuðir gætu liðið frá ákvörðun um umhverfismat þar til framkvæmdir hefjast ef matið verður virkjuninni hagfellt.

Guðmundur segir samtökin helst hafa áhyggjur af áhrifum virkjunarinnar á grunnstreymi í Mývatn sem geti haft áhrif á lífríkið.

Hann vonast þó til þess að það verði alfarið fallið frá framkvæmdinni.

„Ég held að það verði alltaf tekin of mikil áhætta með virkjunarframkvæmdum þarna,“ segir Guðmundur Hörður.