Deilt um úthlutun við Glimmerskarð

Ákveðið var á bæjarstjórnarfundi í Hafnarfirði í síðustu viku að bjóða út fimm lóðir í Skarðshlíð.

Gangi útboðið eftir má búast við því að byggð fyrir um tvö þúsund Hafnfirðinga rísi á svæðinu. Ein þeirra gatna sem fengið hafa nafn í Skarðshlíð heitir Glimmerskarð.

Oddviti Sjálfstæðismanna, Valdimar Svavarsson, gagnrýnir úthlutunina harðlega og segist hafa efasemdir um það hvort hún sé hagkvæm, sérstaklega vegna fjárhagsstöðu sveitarfélagsins og aðstæðna á byggingarmarkaði. Þá eru allar lóðir bæjarins veðsettar og því ljóst að 90 prósent af andvirði lóðanna rennur til Depfa-bankans við sölu þeirra.

„Það sem við höfum viljað gera er að byggja upp á lóðum sem nú þegar eru til staðar, meðal annars á Norðurbakkanum og einnig uppi á Holtinu,“ segir Valdimar.

Að sögn Valdimars er rými fyrir sex hundruð íbúðir sem eru óbyggðar eða eru í byggingu. Hann bendir einnig á að kostnaður við uppbyggingu í kringum lóðaúthlutunina í Skarðshlíð, sem bærinn stendur straum af, sé áætlaður tveir milljarðar.

Valdimar bætir við að efnahagsumhverfið sé þannig að það er alveg óvíst um áhuga á lóðunum. „Nokkrar lóðir voru auglýstar fyrir skömmu til úthlutunar og það var enginn áhugi á þeim,“ segir hann.

Guðrún Ágústa Guðmundsdóttir, bæjarstjóri Hafnarfjarðar, segir að veðsetning á lóðunum hafi verið ljós frá upphafi. Hún áréttar að með sölu á lóðunum er veðsetningu á þeim aflétt.

Aðspurð um áhugaleysi á lóðaúthlutunum í bænum svarar Guðrún Ágústa: „Það var vitað að það voru erfiðar lóðir til úthlutunar.“

Hún bendir svo á, máli sínu til stuðnings, að mikil umferð hafi verið á vef bæjarins um helgina þegar úthlutanirnar voru kynntar. „Um 1.500 manns skoðuðu þessar síður þannig að áhuginn er einhver,“ segir hún.

Aðspurð hvort fjárhagsstaða bæjarins sé ekki heldur þröng fyrir þessar framkvæmdir og hvort standi til að taka lán fyrir þeim svarar Guðrún Ágústa: „Við gerum ekki endilega ráð fyrir lántöku vegna framkvæmda þarna en það er umræða sem á eftir að taka.“

Guðrún Ágústa blæs alfarið á áhyggjur Sjálfstæðismanna. „Þetta er bara „win-win situation“,“ segir hún að lokum og bætir við að þetta sé rökrétt framhald vaxandi bæjarfélags sem er nú með 27 þúsund íbúa.



Athugasemd: Hafnarfjarðarbær vill koma því á framfæri að lóðirnar séu ekki útboðslóðir, heldur lausnar til umsóknar á föstu verði. Um sé að ræða 56 einbýlishúsalóðir, tvö parhús, ellefu raðhúsalóðir og sjö fjöleignarhús. Byggðin muni í heild rúma um 2.000 íbúa en nú sé einungis um fjórðungur lóðanna laus til umsóknar.