Einn á næturvakt fyrir um sextíu íbúa

„Við erum að fara yfir alla þætti þessa máls og það verður skoðað sérstaklega hvort úrbóta sé þörf. Við höfum átt fundi með starfsfólki og íbúum og ætlum að eiga fund með aðstandendum hins látna,“ segir Aðalbjörg Traustadóttir, forstöðumaður þjónustuíbúða Laugardals og Háaleitis. Þjónustuíbúðir fyrir aldraða við Norðurbrún falla undir þann kjarna. Aðfaranótt laugardags lést vistmaður þar af slysförum.

Félagsbústaðir eiga 59 þjónustuíbúðir við Norðurbrún 1. Þar leigir fólk af borginni sem er orðið of veikburða til að dvelja eitt heima en ekki nógu veikt til að vera á hjúkrunarheimili. Íbúarnir hafa lykla að útidyrum. Þeir þurfa mismikla þjónustu, hver og einn á að fá þjónustu í samræmi við heilsufar. Meðalaldur íbúanna er 89 ár.

Um nætur er einn starfsmaður á vakt og hefur hann aðsetur í anddyri hússins. Þar er inngangur í húsið en auk hans eru tveir aðrir inngangar. Öryggismyndavélar eru við alla inngangana. Vaktmaðurinn hefur ekki yfirsýn yfir alla útgangana í einu á sjónvarpsskjá. Auk þess að fylgjast með því hverjir koma og fara inn í húsið á næturvörðurinn að líta til þeirra sem hafa fast innlit og sinna þeim sem hringja og biðja um aðstoð.

„Eitt af því sem við erum að skoða sérstaklega er hvort það þurfi að breyta staðsetningu öryggismyndavéla á þann hátt að vaktmaðurinn hafi yfirsýn yfir alla útgangana í einu,“ segir Aðalbjörg.

Af upptöku úr öryggismyndavél sést að hinn látni fór úr húsi tíu mínútur yfir eitt aðfaranótt laugardags, án þess að næturvörðurinn yrði þess var. Hann féll fram af steinvegg við bílastæði Hrafnistu og um klukkan hálf þrjú fann starfsmaður Hrafnistu hann mikið slasaðan.

Maðurinn var fluttur á sjúkrahús en lést síðar af sárum sínum. Ekki var litið til með honum á nóttunni þar sem þess þótti ekki þörf.

Hinn látni, sem var á níræðisaldri, beið eftir því að komast í færni- og vistunarmat.