Vatnsmýri of dýr fyrir flugið

Erfitt er að sjá annað en að landið undir flugvelli í Vatnsmýrinni sé of dýrt til þess að skynsamlegt sé að nota það undir flugvöll. Þetta skrifar hagfræðingurinn Sigurður Jóhannesson í nýjasta tölublaði Vísbendingar, vikurits um viðskipti og efnahagsmál.

Greinin fjallar um kosti og galla þess að Reykjavíkurflugvöllur verði áfram í Vatnsmýrinni. Þar segir að flugvöllurinn hafi frá byrjun hamlað vexti Reykjavíkur og að Geir Hallgrímsson, þáverandi borgarstjóri, hafi sagt æskilegt að flugvöllurinn yrði ekki til frambúðar í Vatnsmýrinni.

Sigurður vísar í kostnaðar- og nytjagreiningu sem fyrirtækið ParX gerði á flugvallarkostum fyrir nokkrum árum með hjálp danskra sérfræðinga. Greiningin hafi verið gerð frá sjónarhóli allra landsmanna. Þegar kostir eru taldir upp segir að flugvöllur í miðri borg flýti för þeirra sem nota hann. Tvö þúsund manns hafi árið 2011 komið með sjúkraflugi á Reykjavíkurflugvöll en óljóst sé hversu miklu máli staðsetningin hafi skipt fyrir þetta fólk. „Oftast er þyrla notuð þegar mest liggur á að koma fólki undir læknishendur,“ segir í greiningunni.

Hvað varðar megingalla þess að flugvöllurinn sé í miðri borg segir að óvíða sé land dýrara en í Vatnsmýrinni. Vegna þess að engin íbúabyggð sé á svæðinu verði að byggja fjær miðbænum og því fari meiri tími í ferðir innanbæjar. Nýlegar erlendar rannsóknir bendi til þess að náið samhengi sé milli þéttleika byggðar og framleiðni. Auk þess sé hávaði af fluginu í nágrenni vallarins.

Í niðurstöðum matsins kemur fram að mun hagkvæmara sé að flugvöllurinn verði á Hólmsheiði eða í Keflavík heldur en í Vatnsmýrinni. Hreinn hagnaður af þeim kostum á ári hverju myndi nema 35 til 40 milljörðum króna. Þar væri stærsti sparnaðarliðurinn minni ferðatími innan borgarinnar. Markaðsverð byggingarlands í Vatnsmýrinni hafi verið talið 75 milljarðar króna árið 2007 og sé líklega svipað núna. Ef raunvextir væru 5% yrði ársleiga af flugvallarlandinu þrír og hálfur til fjórir milljarðar króna.

Samkvæmt Sigurði þarf mikið að ganga á ef hagga á niðurstöðu þessarar kostnaðar- og nytjagreiningar.