Týndi medalíunni langþráðu um leið

Daði Guðmundsson, leikmaður Fram og nýkrýndur bikarmeistari, hefur í gegnum tíðina verið kallaður herra Fram.

Framarar urðu bikarmeistarar á laugardaginn eftir magnaðan sigur á Stjörnunni í vítaspyrnukeppni. Þetta var fjórði bikarúrslitaleikurinn sem Daði kom að í Framtreyjunni en fram að leiknum á laugardaginn höfðu þeir allir tapast.

Loksins var gullmedalían komin um hálsinn en þar dvaldi hún ekki lengi. Daði náði að týna henni um leið og hann kom inn í búningsklefa og hefur hún ekki fundist enn.

„Ég var með medalíuna á mér þegar ég fór inn í klefa en í öllum fagnaðarlátunum hef ég lagt hana frá mér,“ segir Daði Guðmundsson.

„Líklega hefur einhver bara óvart stungið henni í töskuna en ég vonast til þess að hún verði komin í leitirnar þegar ég fer á æfingu á eftir,“ segir Daði í gær.

„Loksins vann ég þennan bikar og var þetta hápunkturinn á mínum ferli,“ segir Daði. Fyrir bikarúrslitaleikinn árið 2009 gegn Blikum var Daði í byrjunarliðinu en aðeins tæpur í baki. Því var hann sprautaður. Það fór ekki betur en svo að Daði lamaðist í raun í nokkra klukkutíma og

gat ekki spilað.

Daði hefur tekið þátt í 370 leikjum fyrir Fram en Pétur Ormslev á 372 leiki fyrir félagið.

„Mig vantar held ég tvo eða þrjá leiki til að verða leikjahæsti leikmaður í sögu Fram og vonandi hefst það í sumar. Samningur minn rennur út eftir tímabilið en ég hef áhuga á því að vera áfram í Safamýrinni. Vonandi næ ég metinu í ár.“