Sjálfsvígsvaktin brást á réttargeðdeildinni

Sex starfsmenn réttargeðdeildar Landspítalans á Kleppi hafa verið áminntir í starfi fyrir að vanrækja eftirlit með sjúklingi sem talinn var í alvarlegri sjálfsvígshættu. Brot starfsmannanna uppgvötvaðist þegar upptökur úr eftirlitsmyndavélum voru skoðaðar.

„Það sást á upptökum eftirlitsmyndavélanna að starfsmennirnir höfðu ekki viðeigandi eftirlit með sjúklingnum,“ segir Páll Matthíasson, framkvæmdastjóri geðsviðs Landspítalans. Enginn skaðaðist vegna atviksins.

„Það er mjög mikilvægt á svona deild að eftirlitið sé 100 prósent,“ segir Páll. Hann segir verklagið skýrt og atvikið ekki gefið tilefni til að breyta því.

Atvikið kom upp 2. apríl síðastliðinn, og fengu starfsmennirnir sex formlega áminningu vegna brots í starfi rúmum mánuði síðar.

Starfsmennirnir sex óskuðu í kjölfarið eftir því að Persónuvernd tæki til skoðunar hvort réttmætt væri að nýta eftirlitsmyndavélar á réttargeðdeildinni til að fylgjast með störfum starfsfólksins með þessum hætti.

Myndavélar víða

Í úrskurði Persónuverndar kemur fram að spítalinn hafi staðið rétt að því að skoða upptökurnar, og engar athugasemdir gerðar vegna málsins.

„Það eru myndavélar víða, þetta er jú réttargeðdeild þar sem þarf að hafa mikið öryggi,“ segir Páll. Myndavélarnar séu aðeins í sameiginlegum rýmum, ekki í herbergjum sjúklinga.

Í athugasemdum spítalans vegna kvörtunar starfsmannanna segir að brotið sé „litið mjög alvarlegum augum enda mikilvægir hagsmunir sem varða öryggi og líf sjúklings í húfi“. Nauðsynlegt hafi verið að bregðast við brotunum.

Þar var ennfremur vísað til þess að kerfið hafi verið sett upp með vitneskju starfsmannanna til að tryggja öryggi sjúklinganna. Upptökurnar hafi verið skoðaðar til að reyna að upplýsa þjófnaðarmál, en við það hafi vanræksla starfsmannana komið í ljós. Því mótmæltu starfsmennirnir og skoruðu á spítalann að sýna fram á að meint þjófnaðarmál hafi yfir höfuð verið rannsakað.

Segja fleiri hafa stundað sama vinnulag

Í leiðbeiningum fyrir starfsmennina um umræddan sjúkling sagði meðal annars: „Á að baki ítrekaðar tilraunir til að stytta sér aldur. Má því ekki líta af honum auga. Mikilvægt að allir geri sér grein fyrir því að líf einstaklings er á ábyrgð deildarinnar.“ Stjórnendur Landspítalans telja starfsmennina ekki hafa fylgt þessum skýru fyrirmælum.

Starfsmennirnir telja hins vegar að að vinnulag sem þeir hafi fengið áminningu fyrir væri ekki einskorðað við þá eina. 

Páll Matthíasson, framkvæmdastjóri geðsviðs Landspítalans, segir að allt það tímabil sem tæknin hafi leyft yfirmönnum að skoða hafi verið skoðað, og tekið á málum „á viðeigandi hátt“.