Íbúar einbýlishúsagötu vilja losna við unglingaheimili

„Við myndum aldrei taka inn neinn sem væri ógn við umhverfi sitt,“ segir Jóhanna Fleckenstein, forstöðukona í Vinakoti, um kvörtun íbúa í Fjóluhvammi í Hafnarfirði sem eru ósáttir við að í einu einbýlishúsa götunnar sé rekið heimili fyrir unglinga í vanda.

Íbúarnir segja að um sé að ræða atvinnustarfsemi sem eigi ekki heima í íbúðahverfi. Einn íbúi í götunni sem ekki vill láta nafns getið segir málið eiga sér forsögu. Í húsinu hafi um árabil verið rekin frönsk ferðaskrifstofa sem leigt hafi húsnæðið. Því hafi fylgt ónæði.

Íbúinn segir málið einfaldlega snúast um þá spurningu hvort menn geti leigt húsið sitt undir fyrirtæki í íbúðabyggð. Það hafi ekkert með leigjendurna að gera sem slíka, þeir séu ágætis fólk.

Skipulagsfulltrúi bæjarins er sammála nágrönnunum en fulltrúar í skipulagsráði telja málið ekki skýrt og frestuðu í gær afgreiðslu þess þar til álit lögmanns lægi fyrir.

Vinakot opnaði heimili fyrir drengi í Fjóluhvammi fyrir tveimur mánuðum og fyrir stúlkur annars staðar í Hafnarfirði í desember. Jóhanna forstöðukona í Fjóluhvammi undirstrikar að leyfi séu fyrir starfseminni bæði frá slökkviliði og heilbrigðisfulltrúa. Ekki sé um vistheimili að ræða heldur búsetuúrræði og því hafi engar sérstakar breytingar verið gerðar á húsnæðinu. Aðeins einn til tveir séu þar til heimilis í einu og starfsmenn oftast tveir eða þrír. Í Fjóluhvammi sé nú aðeins einn unglingspiltur.

„Mér skilst að það sem aðallega hafi truflað nágrannana sé að lögreglan hefur verið kölluð hingað fjórum sinnum á þessum tveimur mánuðum. Ég held að þau hafi aldrei orðið fyrir neinni annarri upplifun sem tengist drengnum,“ segir Jóhanna, sem kveður Vinakot ætla að bjóða nágrönnunum á kynningarfund.

„Þetta er bara heimili fyrir börn sem eru með flókinn vanda og eiga ekki í mörg hús að venda. Við viljum reyna að ná sátt og vinna þetta með nágrönnunum en ef það fer að halla á hag barnsins verðum við að finna aðra lausn,“ segir Jóhanna.

Vinakot fyrir börn

Fyrirtækið Vinakot ehf. er úrræði ætlað börnum á aldrinum tólf til átján ára sem glíma við fjölþættan hegðunarvanda og þurfa til dæmis búsetu, meðferð, stuðning og ráðgjöf til að ná tökum á lífi sínu, samkvæmt heimasíðu Vinakots.

Markhópurinn er börn og ungmenni sem af ýmsum ástæðum hafa ekki náð að fóta sig þrátt fyrir ítrekuð inngrip.