Ekki tekið afstöðu til undirskriftasöfnunar

Ólafur Ragnar Grímsson, forseti Íslands, segist enn vera á þeirri skoðun að sjávarútvegs- og kvótamál séu vel til þess fallin að fara í þjóðaratkvæðagreiðslu. Forseti lýsti þessu yfir í aðdraganda kosninga á síðasta ári og hafa ummæli hans verið rifjuð upp í tengslum við undirskriftasöfnun gegn breytingum á veiðileyfagjaldi.

„Grundvallarskipan á meginauðlindum Íslendinga er vel til þess fallin að þjóðin ákveði sjálf hvernig þeirri skipan sé háttað. Ef þjóðaratkvæðagreiðslur eru tæki í nútímasamfélagi, sem ég tel að þær eigi að vera, þá er skipan höfuðauðlinda þjóðarinnar og nýting tvímælalaust á dagskrá,“ sagði Ólafur Ragnar í samtali við fréttastofu 365 í Þýskalandi í dag.

Þar er forsetinn í opinberri heimsókn í boði Joachims Gauck, forseta Þýskalands. Forseti segist þó ekki hafa tekið afstöðu til þeirrar undirskriftasöfnunar sem nú er í gangi. „Ég tel að það skipti miklu máli fyrir stjórnkerfið og lýðræðisþróunina, störf Alþingis og störf ríkisstjórnarinnar að forseti sé ekki að blanda sér inn í meðferð mála á þinginu.“

Ólafur Ragnar fundar með Angelu Merkel, kanslara Þýskalands á miðvikudag. Með forseta í för er Gunnar Bragi Sveinsson utanríkisráðherra, en hann mun funda með Guido Westerwelle, utanríkisráðherra Þýskalands.

Formleg móttökuathöfn fer fram í Bellevue-höllinni í Berlín á morgun, þriðjudag. Ólafur segir að heimboð Þjóðverja endurspegli mikla vináttu og samstarfsvilja í garð Íslendinga. „Við höfum glímt við mikla erfiðleika og þess vegna er heimsóknin nú á vissan hátt staðfesting þess að okkur hefur tekist að endurreisa okkar efnahagslíf og orðspor.“