Segist ekki hafa látið barn ljúga

„Ég átti aldrei, aldrei nokkurn þátt í að láta barnið ljúga kynferðisbroti upp á föður sinn,“ segir Kristín Snæfells, forstöðukona samtakanna Vörn fyrir börn.

Í Fréttablaðinu á laugardag kom fram að Kristín hefði ásamt móður barns beitt það þrýstingi til að ljúga upp á föður þess sökum um kynferðislega misnotkun. Þetta er haft eftir barninu í málsskjölum í dómsmáli þar sem föður barnsins var dæmt forræði þess í Hæstarétti.

Kristín stofnaði og veitir forstöðu samtökunum Vörn fyrir börn sem reka þjónustumiðstöð fyrir börn sem beitt hafa verið kynferðisofbeldi. Barnaverndaryfirvöld hafa varað við samtökum Kristínar vegna skorts á fagmennsku í starfinu. Kristín undirstrikar að umrætt mál tengist á engan hátt samtökunum, sem hún hafi lagt nærri fimm milljónir króna í að byggja upp.

„Barnaverndarstofu var boðið hingað til að kynna sér starfsemina frá öllum hliðum en hún lét hvorki sjá sig né heyra. Þetta umtalaða mál er ekki hér innanborðs heldur á lögmannsstofu úti í bæ og hefur alltaf verið,“ ítrekar Kristín.