Sáði blómum fyrir fermingarveisluna

„Ég byrjaði í garðrækt um það leyti sem ég fermdist. Mig langaði að gera eitthvað fínt fyrir veisluna og sáði um hundrað blómum og skreytti svo allt heimilið með þeim. Eftir það hef ég verið á fullu í gróðurhúsinu,“ segir hin sextán ára gamla Stella Dögg Blöndal.

Stella er búsett á bænum Jaðri í Bæjarsveit og ræktar hvers kyns grænmeti, kryddjurtir og blóm. Auk þess rekur hún sveitamarkaðinn Ljómalind ásamt öðrum úr sveitinni.

Foreldrar Stellu eru Sigurbjörg Ósk Áskelsdóttir landslagsarkitekt og Eiríkur Blöndal verkfræðingur. Stella segist hafa erft gróðuráhugann frá foreldrum sínum og föðurömmu, en sú er einnig með gróðurhús. Hún segir fjölskyldu sína afar hjálpsama þegar kemur að því að hugsa um plönturnar en viðurkennir að vinirnir séu hálfgáttaðir á þessum mikla gróðuráhuga hennar.

„Mömmu og pabba finnst fínt að fá ferska tómata á morgnana en vinir mínir eru gáttaðir á því hvernig ég nenni þessu. Það fer mikill tími í þetta og stundum er ég í gróðurhúsinu langt fram á nótt; ég hef meira að segja sofnað þar inni,“ segir hún hlæjandi.

Stella heldur nákvæma dagbók um ræktunina og skráir meðal annars hjá sér hvenær jurtir spíra. „Ég nýti þær upplýsingar til að bæta uppskeruna ár frá ári. Það er mjög gaman að prófa sig svona áfram,“ útskýrir hún.

Í haust mun Stella hefja nám við Verzlunarskóla Íslands og flytur þá til ömmu sinnar í Reykjavík. Hún viðurkennir að henni þyki tilhugsunin um að þurfa að yfirgefa sveitina erfið. „Ég á yngri bróður, Jón Björn, og ég samdi við hann um að vökva á meðan ég er í burtu,“ segir hún að lokum.