Vilja rannsaka möguleg brot

Skólayfirvöld í Reykjavík hyggjast tilkynna starfsmann frístundamiðstöðvar til Barnaverndar svo að hún geti grafist fyrir um hvort hann hafi gerst brotlegur við börn á heimilinu. Þetta kom fram í fréttum RÚV í gær.

Fréttablaðið sagði frá því í gær að ríkissaksóknari hefði gefið út ákæru á hendur manninum, sem er rúmlega sextugur, fyrir vörslu barnakláms. Maðurinn var sendur í leyfi þegar málið kom upp.

Haft var eftir lögreglu í fréttum RÚV að ekki væri uppi grunsemdir um að maðurinn hefði brotið gegn börnum og að ekki stæði til að rannsaka það sérstaklega.

Valgerður Janusardóttir, starfsmannastjóri menntasviðs borgarinnar, sagði við RÚV að eftir á að hyggja væri óheppilegt að skólayfirvöld hefðu ekki verið látin vita af því í hvaða ferli málið væri hjá lögreglu. Barnavernd geti hins vegar hjálpað til við að upplýsa hvort eitthvað hafi verið athugavert við störf mannsins með börnunum.

Fram kom í Fréttablaðinu í gær að foreldrum barna á frístundaheimilinu hefði ekki verið gert viðvart um málið.



Hófst með árás

Málið hófst þegar ráðist var á manninn í fyrrasumar, að sögn árásarmannanna vegna þess að hann væri „barnaperri“. Hann var þá bundinn með rafmagnssnúru á höndum ofan í baðkari, keflaður með tusku og rændur. Honum var haldið nauðugum á heimili sínu í sex klukkustundir.

Þá var lagt hald á tölvu hans en hún ekki skoðuð fyrr en fimm mánuðum síðar, að sögn lögreglu vegna þess hversu mikið álag var á tölvurannsóknardeild hennar.