Framkvæmdir settar í fimmta gír

Starfsmenn malbikunarstöðvarinnar Höfða eru nú í óða önn að malbika götur Reykjavíkurborgar. Framkvæmdir hófust í lok maí og eru áætluð verklok um miðjan september.

Rigningardagar og slæmt veður í byrjun sumars hafa þó sett verulegt strik í reikninginn og endurnýjun gatna gengið talsvert hægar fyrir sig miðað við það sem hefðbundið getur talist.

„Framvinda verkefna er ekki jafn góð og áætlun gerir ráð fyrir og hefur framkvæmdum seinkað um eina og hálfa viku,“ segir Bergþóra Kristinsdóttir, verkefnastjóri hjá Eflu verkfræðistofu sem sér um eftirlit malbikunarframkvæmda hjá Reykjavíkurborg.

„Ef þessi ótíð heldur áfram munu framkvæmdir líklega teygja sig lengra fram eftir sumri,“ segir Bergþóra, sem bendir þó á að enn sé vonast til að verkefnið klárist á þeim tíma sem upphaflega var lagt upp með.

„Þetta fór illa af stað en með viðsnúningi í veðrinu undanfarna daga höfum við náð áætlun,“ segir Baldur Einarsson, tæknistjóri hjá Höfða sem sér um framkvæmdirnar hjá borginni.