Bíða rannsókna í máli níðingsins í Vesturbæ

Rúmlega þrítugur maður, sem talinn er hafa numið tíu ára stelpu á brott í Vesturbæ um miðjan maí og beitt hana kynferðisofbeldi, hefur verið látinn sæta geðrannsókn.

Lögregla bíður enn niðurstöðu geðrannsóknarinnar, og auk þess niðurstöðu DNA-rannsóknar sem unnin var í Svíþjóð, að sögn Björgvins Björgvinssonar, yfirmanns kynferðisbrotadeildar lögreglunnar. „En ég á von á að málið verði klárað í næstu viku,“ segir hann.

Maðurinn er talinn hafa ekið með stúlkuna út að borgarmörkum og brotið gróflega gegn henni kynferðislega.

Samkvæmt heimildum Fréttablaðsins hefur hann verið yfirheyrður í þrígang og heldur enn fast við þann framburð að hann muni ekkert eftir atburðinum. Hann hafi verið afar illa sofinn og undir áhrifum vímugjafa.

Sönnunargögnin gegn manninum eru þó ótvíræð og hann mun því ekki draga í efa að hann hafi gerst brotlegur við stúlkuna þótt hann muni ekki eftir því, samkvæmt heimildum blaðsins.

Maðurinn hefur sætt gæsluvarðhaldi á grundvelli almannahagsmuna undanfarið. Það rennur út 28. júní. Björgvin segir ekki ljóst hvort farið verður fram á framlengingu á því.