Síbrotamaður ákærður fyrir rán með kúbeini

Ríkissaksóknari hefur gefið út ákæru á hendur tveimur Akureyringum, 26 ára manni og 29 ára konu, fyrir vopnað rán og sérstaklega hættulega líkamsárás í júní 2012.

Í ákærunni er þeim gefið að sök að hafa sammælst um það 3. júní í fyrra að fremja rán í Akureyrarapóteki í verslunarmiðstöðinni Kaupangi.

Þau hafi farið grímuklædd og vopnuð bæði hnífum og kúbeini inn um opnar dyr á starfsmannainngangi apóteksins og lent þar í átökum við tæplega fertugan starfsmann.

Í ákærunni segir að konan hafi hrint starfsmanninum þegar hann reyndi að halda félaga hennar, sem heitir Alexander Jóhannesson og er margdæmdur ofbeldismaður.

Alexander er þá sagður hafa slegið starfsmanninn tvisvar til þrisvar sinnum með kúbeininu, þar af einu sinni í höfuðið, hrifsað með sér peninga sem lágu á borði og í kjölfarið hafi þau bæði stokkið á flótta. Starfsmaðurinn hlaut bólgur á hnakka og eymsli á hálsi.

Jafnframt er Alexander ákærður fyrir tvö smávægileg fíkniefnabrot. Ákæran var gefin út síðasta dag maímánaðar og verður þingfest í dag.

Stakk þrjá og gekk berserksgang í Grímsey

Alexander Jóhannesson á langan sakaferil að baki sem hófst þegar hann var átján og var sektaður fyrir fíkniefnabrot. Síðan hefur hann hlotið nokkra dóma fyrir ofbeldisverk, auðgunar- og fíkniefnabrot.



Í júlí 2008 komst hann í fréttir þegar hann gekk berserksgang vopnaður hníf og sleggu á fögnuði í tengslum við árlega sjóstangveiðihátíð í Grímsey, hafði í hótunum við fólk og veittist að sérsveitarmönnum sem þangað voru komnir til að handtaka hann. Fyrir það fékk hann fjögurra mánaða fangelsisdóm.

Mánuði áður hafði hann fengið 20 mánaða dóm fyrir að stinga þrjá menn með hníf á Akureyri. Við ákvörðun þeirrar refsingar var tekið tillit til ungs aldurs og þess að hann var byrjaður að snúa lífi sínu á réttan kjöl.