700 tilkynningar um töpuð reiðhjól

Um 700 tilkynningar um töpuð reiðhjól bárust til lögreglunnar á höfuðborgarsvæðinu í fyrra en um 650 árið þar áður. Árlega endurheimta tíu til þrjátíu manns hjólin sín hjá óskilamunadeild lögreglunnar en um eitt hundrað reiðhjól seljast á hverju ári á uppboði deildarinnar.

„Fólk sem hefur tapað hjólinu sínu kemur og leitar að því hjá okkur en það þyrfti að koma oftar. Oft finnst hjólið ekki fyrr en nokkrum mánuðum eftir að það tapaðist,“ segir Telma Glóey Jónsdóttir, starfsmaður óskilamunadeildarinnar. Hún getur þess að það sé undantekning ef lögreglan er látin vita af því að tapað hjól hafi fundist.

Langflest hjólanna sem berast til lögreglunnar eru fullorðinshjól. „Sum eru garmar sem hafa legið lengi úti en önnur eru í mjög góðu ástandi. Það eru meiri líkur á að eigandi finnist ef hann hefur skráð hjá sér stellnúmerið á hjólinu.“

Að sögn Telmu er mikilvægt að hafa sterkan lás á hjólinu og festa það við eitthvað. „Best er að nota lás sem ekki er hægt að klippa í sundur en slíkir lásar eru að vísu dýrir og þungir.“

Samkvæmt könnun sænsku vefsíðunnar Smartson eru lásar úr hertu stáli öruggustu lásarnir. Lásasmiðir voru fengnir til þess að reyna að brjóta upp lása úr vír og hertu stáli og notuðu þeir verkfæri sem talið var að þjófar gætu auðveldlega borið með sér, eins og til dæmis hamar, klippur, sög og skrúfjárn. Lásasmiðirnir voru eina mínútu að klippa í sundur sterkasta víralásinn. Suma gátu þeir strax klippt í sundur.

Á vefsíðunni er greint frá því að tryggingafélög geri venjulega kröfu um að lásar séu prófaðir og samþykktir af Stöldskyddsföreningen, óháðum samtökum sem vinna að forvörnum og öryggismálum.

Samkvæmt upplýsingum frá tryggingafélögunum VÍS, Sjóvá og TM krefjast þau ekki sérstakra lása fyrir reiðhjól, heldur er krafa um að hjólið hafi verið læst.

Hjá reiðhjólaversluninni Erninum fengust þær upplýsingar að sala á lásum úr hertu stáli, svokölluðum U-lásum, hafi aukist undanfarin þrjú ár. Um tíu prósent af þeim lásum sem seljast hjá Erninum teljast til öruggra lása sem viðurkenndir eru af tryggingafélögum í nágrannalöndunum.