Endurheimti máttinn í fótum og hleypur þvert yfir landið

Tékkinn René Kujan ætlar að hlaupa þvert yfir Ísland, frá norðri til suðurs, til styrktar Hollvinum Grensásdeildar. René varð fyrir slysi í heimalandi sínu fyrir tæpum sex árum og missti allan mátt í fótum.

Með einstökum dugnaði endurheimti hann göngu- og hlaupafærni sína og ákvað í kjölfarið að hlaupa sem víðast og safna áheitum fyrir þau sem ekki hafa verið eins lánsöm og hann sjálfur. Í fyrra hljóp René umhverfis Ísland til styrktar Íþróttasambandi fatlaðra en þá hreifst hann mjög af landinu.

Hann er því kominn aftur hingað til að hlaupa en að þessu sinni verður hlaupið öllu erfiðara, þar sem lengsti hluti hlaupaleiðarinnar liggur um óbyggðirnar.

Hlaupið er alls um 500 kílómetrar að lengd og er áætlað að það taki um tvær vikur en hann leggur af stað í dag.

Leiðin hefst á Rifstanga á Melrakkasléttu, þaðan liggur leiðin yfir Sprengisand og Fjallabaksleið nyrðri og lýkur fyrir neðan Hjörleifshöfða, ekki langt frá Vík í Mýrdal. Stuðningslið verður René til halds og traust en allan nauðsynlegan búnað hefur hann í kerru sem hann bindur við sig.