Símtöl í útlöndum verða á sama verði og í heimalandinu

Kostnaður við farsímanotkun í löndum Evrópusambandsins mun lækka til muna þegar ný fjarskiptalög taka gildi á næsta ári. Með nýju lögunum er tekið stórt skref í að búa til einn stóran fjarskiptamarkað fyrir þjóðir Evrópu. Þannig geta farsímanotendur á ferðalagi á milli Evrópulanda valið sjálfir hvaða símafyrirtæki þeir nota í hverju landi fyrir sig.

Margir Íslendingar hafa brennt sig á núverandi fyrirkomulagi gjaldtökunnar en það getur reynst mjög kostnaðarsamt að nota farsímakerfin á milli landa. Dæmi eru um íslenska ferðalanga sem hafa þurft að greiða tugi þúsunda vegna farsímanotkunar á erlendri grundu.

„Við innleiðum regluverk Evrópusambandsins hér á landi, það liggur fyrir. Að öllu óbreyttu, gangi lögin í gegn í Evrópu, þá er ekki útilokað að ráðast þurfi í sérstakar lagabreytingar hér á landi og það getur tekið tíma. Þannig geta Íslendingar reiknað með breytingunum nokkrum mánuðum síðar,“ sagði Hrafnkell V. Gíslason, forstjóri Póst- og fjarskiptastofnunar, í samtali við Fréttablaðið.

Hrafnkell segir að í nokkur ár hafi verið stefnt að breytingum á gjaldtöku fjarskiptatækja innan Evrópu í nokkur ár og lögin aðeins lokahnykkurinn í því ferli.

Þá munu notendurnir ekki lengur vera bundnir svokölluðum reikisamningum, sem eru samningar sem fjarskiptafyrirtæki gera á milli landa, eins konar þjónustusamningur um gjöld á fjarskiptum.

Líklegt þykir að hinar nýju reglur taki gildi í Evrópu 1. júlí og fáeinum mánuðum síðar hér á landi.