Játaði brot gegn barni en fór samt með því í bústað

Maður sem Héraðsdómur Norðurlands eystra hefur nú dæmt í átján mánaða fangelsi játaði fyrir móður og stjúpföður þrettán ára gamallar stúlku að hafa brotið gegn henni kynferðislega en fékk engu að síður að koma með fjölskyldunni í sumarbústaðaferð vorið eftir, þar sem hann braut gegn henni aftur.

Þetta kemur fram í dómnum. Í honum segir: „Ljóst er að ákærða var leyft að slást í hópinn með fjölskyldunni í sumarbústaðarferð, þrátt fyrir að hafa, að sögn móður hennar og unnusta móðurinnar, viðurkennt að hafa framið kynferðisbrot gegn stúlkunni.“

Brotið framdi maðurinn gegn stjúpdóttur vinar síns, sem þá var tólf og þrettán ára gömul.

Maðurinn er sakfelldur fyrir nauðgun með því að hafa leitað á stúlkuna á heimili sínu sumarið 2011, reynt að kyssa hana, káfað á brjóstum hennar og stungið fingri í leggöng hennar.

Í öðrum ákærulið er honum gefið að sök sams konar brot í sumarbústaðarferð vorið eftir. Hann var sýknaður af því að hafa stungið fingri í leggöng stúlkunnar í heitum potti við bústaðinn en sakfelldur fyrir að hafa brotið gegn henni innandyra.

Stúlkan lýsti því að hún hefði frosið þegar maðurinn leitaði á hana í heita pottinum. „Ég var svona dauð dúkka, bara gat ekki hreyft mig eða neitt,“ sagði hún. Mamma hennar taldi hins vegar að hún hefði aldrei verið ein með manninum í pottinum og því var hann sýknaður af þeim lið ákærunnar.

Maðurinn viðurkenndi fyrir dómi að hafa átt í kynferðislegum samskiptum við stúlkuna en hélt því fram að hann hefði talið hana sextán eða sautján ára gamla. Dómurinn telur þá málsvörn fjarstæðukennda, enda augljóst að stúlkan sé miklum mun yngri.