Húsbrot tengdist handrukkun

Fjórir menn á aldrinum 18 til 23 ára hafa verið úrskurðaðir í gæsluvarðhald til 10. júní vegna ráns og frelsissviptingar í Grafarvogi á laugardag. Ráðist var inn á heimili manns á sjötugsaldri, honum ógnað með hnífi og hann bundinn á höndum og fótum. Mennirnir höfðu á brott með sér átta skotvopn og skotfæri af heimili mannsins. Þeir hafa allir komið við sögu lögreglu áður.

Maðurinn sem ráðist var á sagði í samtali við Fréttablaðið líðan sína eftir atvikum góða en að eðlilega væri honum brugðið. „Það dugir lítið annað en að reyna bara að vera harður af sér,“ sagði maðurinn. Vopnin fundust skömmu síðar í húsleit í Hlíðahverfi en vitni gátu gefið greinargóða lýsingu á bíl mannanna.

Samkvæmt upplýsingum blaðsins er talið að málið tengist handrukkun hjá barnabarni fórnarlambsins. Sá ku vera mjög ungur að árum og á jafnframt við félagslegan vanda að etja. Rannsókn lögreglunnar beinist meðal annars að tengslum mannanna við vélhjólaklíkuna Outlaws.

Fórnarlamb árásarinnar leitaði til nágranna síns í næstu íbúð, þá bundinn á höndum og fótum. Nágranninn segist einnig í miklu áfalli. „Til þess að losa um fjötrana þurfti ég að nota sax. Þetta var svo kirfilega bundið. Við eigum þessu ekki að venjast hér í þessu góða hverfi,“ sagði nágranninn sem ekki vill láta nafns síns getið.