Ný aðflugsljós við Ægisíðu nauðsynleg segir Jón Gnarr

„Þarna á að fara að setja upp stór og ljót mannvirki, sem þar að auki eru með sterka lýsingu, á einni mestu útivistarperlu borgarinnar,“ segir Gísli Marteinn Baldursson, borgarfulltrúi Sjálfstæðisflokksins, um fyrirhuguð lendingarljós við Ægisíðu.

Ljósin eru hluti af samkomulagi Reykjavíkurborgar og innanríkisráðuneytisins um Reykjavíkurflugvöll sem gert var 19. apríl.

Fyrirhugað er að setja ljósin, sem eru átta talsins, upp í sumar. Þau minnstu eru 2,25 metrar á hæð en þau stærstu 5,4 metrar. Þau verða meðal annars við göngustíginn sem er við Ægisíðu og nálægt byggð í Skerjagarðinum. Þau ná frá flugbrautarendanum og niður í fjöruborð Skerjafjarðar.

Í umsögn skipulagsstjóra borgarinnar um framkvæmdina segir að ljósin muni setja verulegan svip á núverandi svæði, sem fyrst og fremst sé nýtt til útivistar og afþreyingar. „Einnig er umhugsunarvert að samkvæmt tillögunni er gert ráð fyrir því að ljósin komi til með að ná niður í fjöruborðið en skv. gildandi aðalskipulagi og drögum að endurskoðun þess fellur nær öll strönd Skerjafjarðar undir svokallaða hverfavernd,“ segir í umsögninni.

Jón Gnarr borgarstjóri segir ljósin vera nauðsynlegt öryggisatriði fyrir flugvöllinn. Þetta sé hluti af samkomulaginu við ríkið. „Það var verið að reyna að komast að samkomulagi sem sættir alla og líka með tilliti til öryggissjónarmiða,“ segir Jón. „Þetta er hluti af því að vera með flugvöll í miðbænum. Við getum ekki bæði geymt kökuna og étið hana.“

Gísli Marteinn segir það hlutverk borgarfulltrúa að gæta að hagsmunum útivistarsvæðanna. Við hinn enda flugbrautarinnar eigi að fella niður tré í Öskjuhlíðinni, vegna flugs flugvéla.

„Ég er fyrst og fremst að standa vörð um útivistarsvæði borgarinnar, annars vegar Öskjuhlíðina og hins vegar Ægisíðuna,“ segir Gísi Marteinn.