Tónlistin fái sömu endurgreiðslu og bíó

Kveðið er á um það í stefnuyfirlýsingu ríkisstjórnar Framsóknarflokks og Sjálfstæðisflokks að tónlist njóti sömu hvetjandi ívilnana og kvikmyndagerð hefur gert hér á landi, það er, að hluti kostnaðar við tónlistarupptökur verði endurgreiddur. Þórir Jóhannsson, framkvæmdastjóri og annar eigenda Stúdíós Sýrlands, segir mjög jákvætt ef af því verður.

„Við höfum horft til kvikmyndabransans í svolítinn tíma og haft þetta á bak við eyrað. Í desember lagði Framsóknarflokkurinn fram frumvarp sem lagði til 20% endurgreiðslu af tónlistarupptökum en það komst ekki að það kjörtímabilið. En það er ánægjulegt að sjá að það fylgir nú inn í stjórnarsáttmálann,“ segir Þórir. Hængur er þó á.

„Í sjálfu sér virkar þetta vel í kvikmyndabransanum því þar skipta upphæðirnar tugum eða hundruðum milljóna í hverju verkefni en kostnaðurinn í kringum eina plötu er miklu minni, kannski bara ein til þrjár milljónir. Þá er mjög dýrt hlutfallslega að stofna fyrirtæki, sem kostar 150 þúsund krónur, í kringum hverja plötu til að fá endurgreiðslu,“ segir Þórir.

Ef þetta verður ekki útfært öðruvísi komi endurgreiðslan ekki til með að nýtast stærstum hluta plötuútgáfu, aðeins stórum og dýrum útgáfum og erlendum aðilum.

„Það skiptir mestu máli að endurgreiðsluferlið sé einfalt, gegnsætt og auðvelt að fara í gegnum svo fleiri geti nýtt sér endurgreiðslurnar og hægt verði að selja þetta erlendis.“ Þórir segir að erlendir tónlistarmenn hafi áhuga á að taka upp hér á landi enda séu íslensk hljóðver á heimsmælikvarða, þau standist allan samanburð með tæki og aðstöðu.

„Eitt af því sem við höfum verið að vinna í að fá til landsins eru stór erlend kvikmyndaskor til að taka upp hér. Þau fara mikið til Austur-Evrópu, m.a. til Prag og Bratislava, og eins og staðan er núna erum við í svipuðum verðflokki og þau lönd. Tuttugu prósenta niðurgreiðsla getur þýtt mikla aukningu í upptökum fyrir stórar erlendar kvikmyndir, tölvuleiki, sjónvarpsþætti og annað slíkt,“ segir Þórir. - ig