Agnarsmár vágestur gerir vart við sig á ný

Smávaxið fiðrildi, birkikemba, gerir mjög vart við sig annað árið í röð. Það hefur náð undraverðri útbreiðslu á stuttum tíma. Heimsókn þessa skordýrs þýðir töluverðar skemmdir á birkitrjám. Ekki er talin ástæða til þess að óttast meiriháttar skemmdir á birkiskógum, er mat sérfræðings nema til komi fleiri skaðvaldar vegna hlýnunar.

Erling Ólafsson, dýrafræðingur hjá Náttúrufræðistofnun Íslands, vakti athygli á mikilli útbreiðslu birkikembu á pödduvef NÍ í fyrravor, en það er veglegur upplýsingabanki um skordýr hvers konar sem hann á veg og vanda af. Hann segir að eins og í fyrra hafi fjöldi fólks spurst fyrir, enda verði fólk vart við stóra hópa af fiðrildinu annað árið í röð. Birkikembu varð fyrst vart í Hveragerði árið 2005.

Í fyrravor var ljóst orðið að birkikembunni hafði vaxið mjög ásmegin og fannst víða í Reykjavík og suður í Hafnarfjörð. Auk þess var hún mætt til leiks í trjárækt Skógræktar ríkisins að Mógilsá í Kollafirði og í görðum á Selfossi. Ummerkin á trjánum, brúnir uppblásnir laufbelgir, eru einkennandi fyrir birkikembu.

Erling telur að hér sé mætt til leiks tegund sem á eftir að fjölga sér hratt á komandi árum og dreifast út víðar um garða og trjáræktir, jafnvel í náttúrulega birkiskóga. Halldór Sverrisson, plöntusjúkdómafræðingur og lektor við Landbúnaðarháskóla Íslands, segir það greinilegt að fiðrildið geti skaðað birkitré í görðum á höfuðborgarsvæðinu. Þar séu skilyrði góð fyrir tegundina.

„Í Ölfusinu, þar sem þessi tegund hefur verið í tíu ár virðast skemmdir minni. Útbreiðslan er hæg og bundin við Suðvesturland enn þá. Ég tel litlar líkur á að fiðrildið valdi verulegum skemmdum í náttúrulegum birkiskógum. En þetta er viðbót við annað sem fyrir er og eykur líklega beitarálag á skóginn eitthvað. Og ef fleiri birkiskaðvaldar berast til landsins geta áhrif á skóginn orðið neikvæð,“ segir Halldór.