Ríkið hefur framtíð Bæjarbíós í hendi sér

Hafnarfjarðarbær telur ekki forsendur til að endurskoða ákvörðun sína um að fela Gaflaraleikhúsinu rekstur Bæjarbíós nema til komi skýr vilji stjórnvalda til að leggja meira fjármagn í sýningarhluta Kvikmyndasafns Íslands eins og bæjaryfirvöld hafa ítrekað óskað eftir.

„Niðurstaða er ekki komin í málið. Við teljum ekki ásættanlegt að halda áfram núverandi starfsemi við óbreyttar aðstæður og það er ráðuneytisins að sýna vilja með fjárframlagi til safnsins, svo hægt sé að vera með meira líf í húsinu. Það er í raun engin breyting á afstöðu sveitarfélagsins og boltinn er hjá ráðuneytinu,“ segir Guðrún Ágústa Guðmundsdóttir, bæjarstjóri í Hafnarfirði, um hugmyndir bæjarráðs um breyttan rekstur Bæjarbíós.

Grunnhugmynd bæjaryfirvalda er að auka starfsemina í húsinu, en Kvikmyndasafn Íslands hefur haft aðstöðuna til umráða um nokkurra ára skeið án endurgjalds. Erlendur Sveinsson, forstöðumaður Kvikmyndasafnsins, er þeirrar skoðunar að starfsemi safnsins og leikhúss eigi þar ekki saman og leggst alfarið gegn hugmyndum bæjarráðs. Fór hann þess á leit að ákvörðun um breyttan rekstur í Bæjarbíói yrði frestað og samningur við Kvikmyndasafnið yrði framlengdur að minnsta kosti til næsta vors.

Í bréfi Erlends til bæjarins segir að verði leikhúsi falinn rekstur hússins verði kvikmyndasýningum hætt. „Mun safnið þá eðli málsins samkvæmt í kjölfarið taka niður sýningaraðstöðu sína, sýningarvélar, myndvarpa, sýningartjald, öryggiskerfi og fleira. Jafnframt er eðlilegt að safnið kanni rétt sinn vegna kostnaðar sem það hefur lagt út í,“ skrifar Erlendur eins og Fréttablaðið greindi frá 7. maí.

Samningar bæjarins um leigu húsnæðis undir leiklistarstarfsemi eru lausir um næstu áramót. Því telja bæjaryfirvöld að niðurstaða ráðuneytisins um aðkomu að starfseminni verði að liggja fyrir í lok maí, í síðasta lagi.

Hafnarfjarðarbær leigir aðstöðu af þriðja aðila undir leiklistar- og aðra menningarstarfsemi og telja bæjaryfirvöld eðlilegt að endurskoða hvernig fjármagni sé best varið í þessum málaflokki. Samkvæmt heimildum Fréttablaðsins telja bæjaryfirvöld að upphafleg áform um nýtingu hússins hafi ekki gengið eftir nema að litlum hluta.

Ekki náðist í Erlend Sveinsson við vinnslu fréttarinnar.