Breyta gamla bókasafninu í íbúðarhús

Til stendur að breyta gamla bókasafninu í Hafnarfirði, sem stendur við Mjósund 10, í íbúðarhúsnæði. Húsið hýsti áður samtökin Regnbogabörn og félagsmiðstöð fyrir unglinga 16 ára og eldri.

Eignarhaldsfélagið Mjósund 10 ehf. hefur sótt um heimild til skipulags- og byggingaráðs um breytinga á aðalskipulagi en samkvæmt núgildandi skipulagi er aðeins gert ráð fyrir að stofnanir séu í húsinu. Samkvæmt fundargerð ráðsins er tekið vel í hugmyndina og lagt til að bæjarstjórn vinni að málinu. Húsið er inni í miðju íbúðahverfi.

Mjósund 10 er sögufrægt hús. Það var vígt sem bókhlaða þann 31. maí árið 1956 en arkitekt þess var Sigurður J. Ólafsson bæjarverkfræðingur. Bókasafn Hafnarfjarðar hafði aðsetur í húsinu en flutti í nýtt húsnæði við Strandgötu árið 2002.

Vífilfell keypti húsið sama ár og afhenti það samtökunum Regnbogabörnum til afnota. Kaupverðið var þá 26 milljónir króna. Regnborgabörn höfðu aðsetur á efri hæð hússins en félagsmiðstöð fyrir unglinga 16 ára og eldri var rekin í húsinu þar til um síðustu áramót.

Að sögn Stefáns Karls Stefánssonar, formanns Regnbogabarna, rann þjónustusamningur samtakanna við Hafnarfjarðarbæ út. Þar með hafi grundvöllurinn fyrir samtökin að halda úti tæplega 600 fermetra húsi brostið og því hafi þau flutt í nýtt húsnæði við Stapahraun. Húsið hafi auk þess verið komið verulega til ára sinna og viðhaldið verið kostnaðarsamt fyrir samtökin.

Samkvæmt heimildum Fréttablaðsins stendur til að koma gamla bókasafninu í upprunalegt horf og ekki stendur til að selja það áfram.