Efnahagslífið verði tekið í gegn

Samráðsvettvangur um aukna hagsæld á Íslandi hittist í þriðja sinn í gær. Á fundi þess voru víðtækar hagvaxtartillögur verkefnisstjórnar samráðsvettvangsins kynntar og þær ræddar af meðlimum vettvangsins.

Tillögunum sem kynntar voru í gær er ætlað að stuðla að því að markmið sem samráðsvettvangurinn hefur sett sér, og sjá má hér neðar, verði að veruleika. Tillögurnar eru þó einungis upphafið að vinnu samráðsvettvangsins sem stefnir að því að lokaniðurstöðurnar liggi fyrir í haust.

Tillögur verkefnisstjórnarinnar snúa að öllum geirum hagkerfisins: opinbera geiranum, innlendri þjónustu, auðlindageiranum og alþjóðageiranum.

Innan opinbera geirans er meðal annars lagt til að ýmsar stofnanir verði sameinaðar og efldar og að fjölþættar umbætur verði gerðar á fyrirkomulagi heilbrigðis- og menntakerfisins. Í innlenda þjónustugeiranum er til dæmis lagt til að umhverfi tolla og neysluskatta verði einfaldað og að hvatt verði til aukinnar samkeppni. Í auðlindageiranum eru lagðar til breytingar sem stuðla eiga að aukinni arðsemi í orkuframleiðslu og sjálfbærri nýtingu ferðamannastaða. Loks eru settar fram tillögur í alþjóðageiranum sem eiga að sporna gegn skorti á hæfu vinnuafli og tryggja aðgengi fyrirtækja að fjármagni.

Friðik Már Baldursson, sem stýrt hefur vinnu verkefnisstjórnarinnar, segist vonast til þess að tillögurnar nái fram að ganga, í það minnsta að hluta. „Ég vonast eftir því að við berum gæfu til þess að nýta þann skriðþunga sem fylgir þessari vinnu. Ef að við gerum það þá eigum við eftir að nýta einhver þeirra tækifæra sem þessar tillögur lýsa.“

Þá segir Friðrik að umræður samráðsvettvangsins um tillögurnar hafi verið góðar. „Auðvitað var bent á eitthvað sem fólki finnst vanta og á veikleika en umræðurnar voru málefnalegar og góðar og fram kom stuðningur við þetta ferli.“

Loks segir Friðrik að þótt markmið samráðsvettvangsins séu metnaðarfull sé mögulegt að ná þeim. „Þessar tillögur eiga að geta stuðlað að því að við brúum það bil sem er á milli okkar og hinna Norðurlandaríkjanna þegar kemur að framleiðni. Ef við virkilega viljum getum við breytt því.“