Stór verkefni krefjast styrks þingmeirihluta

Stjórnmál Stjórnarmyndunarviðræður milli Sjálfstæðisflokks og Framsóknarflokks hófust í gær og munu halda áfram í dag. „Óvenju vandasöm verk“ bíða úrlausnar á næsta kjörtímabili að sögn Sigmundar Davíðs Gunnlaugssonar, formaður Framsóknarflokksins. Því sé eðlilegast að leitast við, í fyrstu atrennu hið minnsta, að mynda ríkisstjórn með nægilega öflugan meirihluta á þingi til að hafa afl til að sinna þeim verkum.

Í tilkynningu um stjórnarmyndunarviðræðurnar segist Sigmundur hafa fundið góðan vilja hjá Bjarna til að vinna að aðgerðum vegna skuldamála. Horft verði til hugmynda beggja flokkanna til að ná settu marki í þeim málum.

Bjarni og Sigmundur vildu ekki tjá sig að loknum fundi.

Allt frá því fyrir kosningar var líklegasta stjórnarmynstrið talið vera Framsóknarflokkur og Sjálfstæðisflokkur, enda fengu flokkarnir 38 þingsæti af 63.

Þó virtist örla á efasemdum í síðustu viku um að áherslur flokkanna væru samræmanlegar.

Í samtölum Fréttablaðsins við nokkra þingmenn flokkanna tveggja var hins vegar ekki annað að heyra en að fullur vilji væri til þess að flokkarnir tveir næðu saman um stærstu málaflokkana, meðal annars skuldamál, atvinnumál og skatta. Mestar líkur voru taldar á því að samstarf þeirra yrði raunin.

Bjarni sagði í viðtali við Bylgjuna í gær að hann myndi ekki gera kröfu um að fá forsætisráðherrastólinn í þessum viðræðum. Flokkarnir hafa ekki gefið sér tímaramma um viðræðurnar en Bjarni sagðist bjartsýnn á að þær gætu gengið fljótt fyrir sig.

„Ég er bjartsýnn á að vikan muni reynast okkur drjúg til að ljúka verkinu.“

Fyrirsjáanlegt að B og D hefji leikinnGrétar Þór Eyþórsson, prófessor í stjórnmálafræði við Háskólann á Akureyri, segir nokkuð fyrirsjáanlegt að fyrst sé reynt við þetta stjórnarmynstur.

„Það var ekkert óeðlilegt við það að Sigmundur kannaði stöðuna hjá öllum hinum flokkunum en það var alltaf líklegast að stærstu flokkarnir – þeir einu sem geta myndað tveggja flokka stjórn og hafa verið saman í stjórnarandstöðu í fjögur ár – byrjuðu á því að reyna að ná saman.“

Grétar segir að einhver munur sé á stefnuskrám flokkanna en það þurfi ekki að koma í veg fyrir að saman náist.

„Það dettur engum í hug að báðir flokkar nái sínu ítrasta fram í stjórnarmyndunarviðræðum. Það er því ljóst að flokkarnir munu nú reyna að finna málamiðlun sem báðir geta sætt sig við.“