Fíklar sækja í flogaveikilyf

Landlæknisembættið óttast viðvarandi misnotkun flogaveikilyfja. Brögð eru að því að fólk sem hefur lokið meðferð vegna vímuefnavanda falli aftur vegna notkunar lyfjanna, en þau ganga kaupum og sölum á götunni.

Magnús Jóhannsson, sérfræðingur hjá Landlækni, segir merki þess að misnotkun lyfjanna sé á undanhaldi, en talin hafi verið full ástæða til þess að benda á vandann, en um málið er fjallað í nýjasta fréttabréfi embættisins.

Ekki fer á milli mála í fréttabréfinu að orðum er beint til lækna sérstaklega og þeir hvattir til að vera á varðbergi þegar lyfjunum er ávísað. Lyfin sem hér um ræðir eru tvö; pregabalín (Lyrica) og gabapentín sem notuð eru við flogaveiki en hafa einnig ýmsa aðra virkni. Þannig eru lyfin notuð við verkjum og kvíða. Hér leynist hætta fyrir fíkla í bata því Landlæknir greinir frá því að algeng ábending fyrir ávísun á lyfið Lyrica sé kvíði hjá þeim sem eiga við fíknivandamál að stríða. „Til eru frásagnir fólks af því að lyfið hafi valdið falli hjá fólki sem komið var á réttan kjöl,“ segir í fréttabréfinu.

Valgerður Rúnarsdóttir, yfirlæknir á sjúkrahúsinu Vogi, kannast við vandann, og þá helst hvað varðar lyfið Lyrica. Lyfið skaut upp kollinum hjá fólki í meðferð á Vogi stuttu eftir að það kom á markað. Hún tekur skýrt fram að hins vegar noti fjöldi fólks lyfið daglega án nokkurra vandkvæða, þar á meðal þeir sem hafa náð góðum árangri í meðferð.

„Eftir að Lyrica kom á markað sýndi það sig fljótt að það var til vandræða fyrir þá sem hafa fíknisjúkdóm, og fólk notaði það til að fá vímuáhrif. Sumir lentu í vandræðum með lyfið sérstaklega, eða það varð undanfari að falli hjá fólki í bata. Við höfum fengið til okkar fólk þar sem notkun Lyrica er aðalvandamálið,“ segir Valgerður.

Spurð hvort flogaveikilyf gangi kaupum og sölum á götunni segir Valgerður svo vera. „Lyrica gerir það. En það er eins og með róandi lyfin, og auðvitað líka rítalín sem er miklu stærra og alvarlegra vandamál.“

Lyrica er flokkað sem ávanabindandi lyf í eftirliti landlæknis, en mjög algengt er að þeir sem eiga við lyfjafíkn að stríða leiti til margra lækna til að verða sér úti um meira magn. Landlæknir beinir þeim tilmælum til lækna að kanna sögu um misnotkun efnanna, enda virðist sem þeir sem eiga við misnotkun að stríða noti lyfin samhliða ýmsum vímuefnum til að auka virkni þeirra.