Losunarkvóti hækkar verð á flugmiðum til almennings

Flugfélag Íslands þarf að kaupa losunarheimildir vegna útblásturs gróðurhúsalofttegunda fyrir um tuttugu milljónir króna á ári. Að auki bætist við kostnaður upp á nokkrar milljónir vegna utanumhalds.

Árni Gunnarsson forstjóri segir að þetta sé einn af undirliggjandi þáttum sem skýri fyrirhugaða hækkun flugfargjalda hjá félaginu sem verður 1. apríl. „Einhvers staðar verðum við að fá þessa peninga. Þetta er bara íþyngjandi skattur," segir hann.

Heimildirnar eru hluti af viðskiptakerfi Evrópusambandsins með losunarheimildir, en Ísland á aðild að því. Umhverfisstofnun heldur utan um kerfið og hefur heimild til þess að beita stjórnvaldssektum og jafnvel kyrrsetningu ef flugrekendur afla sér ekki kvóta.

Árni telur að kerfið eigi ekki við hér á landi. Því sé komið á fót til að draga úr flugsamgöngum og beina flugfarþegum í Evrópulöndum fremur í lestir. Hér sé engum lestum til að dreifa.

„Helsti valkosturinn við að fljúga innanlands er að keyra í einkabíl. Þar er útblásturinn á hvern farþega meiri en á hvert sæti í flugvél. Þetta er kerfi sem var vanhugsað að taka upp á Íslandi."

Flugrekendur verða 31. mars að hafa skilað inn áætlun um hve mikið þeir hafi losað af gróðurhúsalofttegundum. Þeir hafa síðan frest til 30. apríl til að skila inn losunarheimildum til Umhverfisstofnunar, sem ber að leggja stjórnvaldssekt á þá sem ekki hafa skilað inn í samræmi við losun.

Sektin nemur 100 evrum á hvert tonn sem losað er út í andrúmsloftið án losunarheimilda.